Serchhip District-a MJA Member ten AI an zirho

Mizoram Journalists' Association (MJA), Serchhip District chuan nimin khan an member-te tan Artificial Intelligence (AI) chungchang zirna an buatsaih a, he hun hi Serchhip Bawrhsap Paul L.Khuma chuan a hmanpui a ni.
Serchhip DC Meeting Hall-a AI zirhona ah hian Bawrhsap Paul L. Khuma chuan Serchhip District MJA-ten AI chung-chang zirhona buatsaihna chang an hria chu changkang a tih thu sawiin, thil dangah pawh hetianga changkanna ûm zel turin a chah a, AI hman chuan kawng hrang hrangah awlsamna min thlen a, mahse chulmâm erawh a ngai ve thin tih sawiin, midangte tana rintlak kan nihna turin khawvel changkanna mil zela finna kan zirchhuah a tul thu leh midangte tana kan thiamna leh finna te kan hman ve zel a tul thu sawiin, chumi atana intuaithar zel turin MJA Member te chu a chah bawk a ni.

He hun hmanpuitu Serchhip DIPRO R. Vanneihtluanga pawhin tunlai technology chu a sang tawh em em tih sawiin, thuthar thehdarh thei apui an tam tawh avangin inchher hriam reng a tul thu a sawi a, thuthar thehdarhtu (Media) te chu democracy innghahna lungphum, mipuite hriatna kawnga thuam chaktute an nih thu a sawi a; huaisenna leh dikna nena hna thawk a, thu dik leh rintlak thehdarh kawnga tan la zui zel turin MJA member te chu duhsakna a hlân bawk a ni.

MJA Member te tana AI hman dan zirna ah hian The Frontier Despatch-a Editor, Adam Saprinsanga chu hman niin ani hian chanchinthar buatsaih nana AI leh online-a hmanraw dang hrang hrang hman dan te, AI rindan chintawk neih thiam dante leh tunlai technology mila hnathawh theih dan hrang hrang a zirtir a, zawhna leh chhanna hun hman a ni bawk. He huna Resource Person Adam Saprinsanga hi Google hnuaia AI chung-changa training lo nei tawh a ni.

Nimin-a MJA Member ten AI zirna hun an buatsaih ah hian Serchhip District-a MJA Member mi 13 atangin mi 12 an tel thei a ni.