Serchhip DC Office-a thawktu ten Training an nei

Serchhip Deputy Commissioner Office-a Officer leh Staff zawng zawngte tan ni hnih (2) awh Training 'emPOWERu' kaltlanga ‘Ignite Your Potential’ chu nimin khan Serchhip DC Pisapui Hall-ah a hawnna neih a ni.
He Training hawnna hun hi Addl. DC Dorothy Muansangi'n kaihruaiin Bawrhsap Paul L. Khuma'n a hmanpui a, Bawrhsap chuan he training buatsaih a nih chhan sawiin, sawrkar hnathawkte hna tha tinreng thawk tura kim taka inthuama an awm theihna tur te, Office dawrtute tana biak nuam leh thawh hlawk an nih theih nan te, kum upa tawhte pawh intuaithar reng tur an ni tih inhriat thar leh nan te a ni tih a sawi a. He training atanga an zirchhuah te chu Office mai piah lamah, pawn lamah pawh mi dangte hnena hlanchhawng zel turin duhsakna a hlan bawk.

He training-ah hian Resource Person atan Golda Dell Zohmangaihi hman niin nimin khan Leadership Skills, Stress Management, Ethics & Values leh Personal Effectiveness te zirho a ni a. Vawiin-ah chhunzawm lehin Cross Cultural Sensitization, Service Excellence, Problem Solving & Decision Making leh Team Building Activity te zirho leh a ni ang.