School Education Department Officer te chuan nimin khan School Education Minister Dr. Vanlalthlana hovin Aizawl-a School Education Complex Conference Hall-ah Quarterly Review Meeting vawi 9-na an nei a, he hunah hian Minister chuan Quarterly Review Meeting an neih thin chu zirna siamthatna kawngah an sawtpui thu leh Department hnathawh dan leh harsatna te pawh an hriatchian phah thu a sawi a. Department Officer-te chu mahni thawhna hmun theuhah tan la zel tura fuihin, PM SHRI School kan neih te chu Prime Minister-in a ngaihpawimawh avang leh sum pawh School-in an dawn that avanga tan lak a ngaih thu a sawi bawk. School Education Minister chuan tunhnaia Social Media lama lo lang, Samagra Shiksha-in Text Book leina sum release sual avangin nuai 150 pelhe ta anga ngaih theih chu sum dawngtute hian an pek let mai loh avangin Legal Notice pek an ni a, hemi hnu hian an rawn pe let tawh tih a tarlang bawk.
