RTI Online version 2.0 hman theih turin tlangzarh

Mizoram Chief Information Commissioner (CIC) John Neihlaia chuan Online hmanga mipuiin sawrkar hmalakna kaihhnawih hriat duh an neihte an zawh theihna tura ruahman Mizoram RTI Online tihchangtlun, RTI Online version 2.0 chu nimin khan tlangzarhin Mizo mipuiin RTI an hmang tangkai hle tih a sawi.
A Pisa-a RTI Online Version 2.0 tlangzarhna hunah hian CIC John Neihlaia chuan, Mizoram-ah hian RTI hmansual an tih ang hi a awm lem lo tih sawiin, “State dangah chuan mimal an ngei zawngte va tihbuai nan te an hmang nasa a, Mizoram-ah chuan chutiang chu a awm lem lo,” a ti a; Mizo mipuiten RTI chu tangkai taka an hman thu leh hmang zel se a duh thu a sawi a. RTI Version 2.0 chu a hma aia changtlung leh mipui tana hman awlsam a nih tawh dawn thu sawiin, RTI online chu khawl chiang lo awm palh theih a nih thu leh chutiang a awm chuan thuneitute hnenah hriattir thuai tin turin a chah bawk.

RTI Online Version 2.0 hi Mizoram State e-Governance Society (MSeGS) buatsaih a ni a, he platform tharah hian a hma, kum 2022-a tlangzarh RTI Online Version 1.0 hnathawh dan kawng tam taka thuamthat niin mipui leh Public Authority-te tana hman nuam lehzual tura siam a ni a. CIC in a tlangzarh tak Version 2.0-ah hian RTI dilna apiangin Ticket Number (Registration Number) a nei tawh dawn a, hei hian dilna chhuizui a ti awlsam tawh dawn a ni.

RTI details PDF mipuiten an download ah pawh detail kimchang zawk a lang tawh dawn a, dilna draft siam theihna leh thuziak format hrang hrangte, SPIO leh FAA ten huntiam chhunga hma an lak loh chuan system thar hian RTI diltu hnenah First Appeal emaw, Second Appeal emaw a thehlut thei a ni tih inhriattirna chiang zawk a pek dawn bakah Portal-ah hian Mizo tawngin FAQ dah a ni bawk.