Kumtin October 1-a hman thin khawvel puma Upate Ni, International Day of Older Persons pualin nimin khan District Legal Services Authority (DLSA), Serchhip chuan New Serchhip-a Beiseina In, Old Aged Home-a awmte an hriselna endikna hun, Free Health Check-Up an buatsaih a, Dr. Lalruatsanga leh a thawhpui, Mercy Hospital-a thawktu ten he Home-a awm mekte leh thawktute hriselna dinhmun an endik sak bakah DLSA-a Secretary Josangzeli Tlau chuan Home-a awm mekte dikna chanvo leh an tana hamthatna awm theite hrilhin, tanpui an ngaih hun apiangah Legal Services Authority te chu tanpui tura an inpeih reng thu a sawi bawk. Beiseina In-ah hian mi 8 an awm mek a, Mizoram hmun hrang hrang bakah Mizoram pawn atang pawhin he Home-ah hian awm an awm a, an zinga upa ber chu kum 91 mi niin Cachar lam mi a ni.
Upate Ni pual hian Mizoram Upa Pawl, Serchhip Kawnpui North te nen kum upate tana Dan leh Hrai hriat ngaite leh an hamthatna awm theite inhrilh hriatna hun chu DLSA hian an lo buatsaih sak tawh bawk a ni.
