Police ten mi 48 man leh

Aizawl Traffic Police chuan Inrinni zan dar 9:00 atanga nimin, Pathianni zing khawvar dawn thlengin Aizawl khawpui chhungah 'Zan Special Drive' nei lehin lirthei khalh dan bawhchhiatna hrang hrang avangin mi 48 an man leh a, heng an man te hi Driving License nei lo a lirthei khalh mi 24, tlan phalloh zawnga lirthei khalh mi 12, Helmet khum lova Two Wheeler khalh mi 6 leh rui chunga lirthei khalh mi 4 te an ni a, heng bakah hian lirthei ri bengchheng mi 2, an vaiin mi 48 an man a ni. Aizawl Traffic Police hotute chuan, duty awm remchan lohna hmuna dan bawhchhia; midang tana harsatna thlen thin te chu Traffic Control Room (9366553559 leh 0389-2313061)-ah hriattir theih reng a nih thu sawiin, hma lak zui zel an tum thu pawh an sawi bawk a ni.