MNF President thusawi anga Video thehdarh thu ah MNF in FIR an thehlut
MNF Legal Board tarlan danin tunlai hian MNF President thusawi ni lo, a sawi ni âwm tak Video siam chawp/ tihdanglam thehdarh a ni a; a thu siam chawp thehdarhah chuan, 'MNF hi Pathian leh mipuite zarah kan sawrkar hunah, mipui retheite nuai 5 atanga nuai 15 inkar, kum tin pawisa kan pe dawn a' tia Zoramthanga thusawi anga siam a awm a. Video thehdarhah chuan thuziak dah tel a ni tih an tarlang a ni.
Thu diklo hmanga video thehdarh chu BNS Section 336(4) bawhchhiatna lian tak a nih thu tarlangin MNF Legal Board chuan, Video siamchawp chu thudiklo hmanga MNF President Zoramthanga nasa taka tihhminghliaua tihchhiat vek tumna leh MNF party tihchhiat vekna tura mipui bum tumna ngialngan tak niin an sawi a; Cyber Crime Police Station-ah hian he thil hi dan bawhchhiatna a nih avangin BNSS Section 173 hnuaiah FIR ziaklut tur te, Video siamtu leh thehdarhtute zawng chhuaka dan anga hrem an nih ngei theihna tura hma la turte in an ngen a ni. MNF Legal Board-in MNF President thusawi siamchawp thehdarhtu nia an tarlante chu - ZPM Media Chairman leh Minister of State B. Lalchhanzova, Facebook username Lalbuaia Vanchhawng leh Facebook username Marini ZPM (Lalrinmawii, Khawzawl Vengthar) te an ni.