Mizoram State hmasawnn a la ni dawn tih sawi
Prime Minister Narendra Modi-a'n ram mipui tana rawngbawl hna a thawh kum 25 tlin lawmna pualin BJP Mizoram chuan nimin khan Aizawl-a BJP Mizoram Office atangin Vanapa Hall kawt thleng kawng an zawh a, Vanapa Hall kawt-ah hian BJP Mizoram President Dr. K. Beichhua chuan meichher chhiin, he ni in a tum ber chu mahni indah tha a, midangte tana luanchhuah, Light of Service leh Selfless Service a nih thu a sawi a, “Prime Minister Modi-a chuan a kutah mawhphurhna a awm tan atangin mahni intheihhnghilh thakin ram mipuite tan hna a thawk a, he a hnathawh avang hian India ram pawhin hma a sawn phah hle a, Vawiin-ah pawh India chu dinhmun tha takah a ding a ni,” a ti a. Modi-a kaihhruai hnuaiah Mizoram pawh State hmasawn, (Developed State) a la ni dawn tih a sawi bawk.
Dr. K. Beichhua chuan 'Seva Sankalp Abhiyan' puala hun an hman mek ah hian Party Politics dah thain midang tana rawngbawlna hun atan an hmang tih sawiin, “17th September atanga 17th October, 2026 chhung kawng hrang hranga luanchhuahna hun hi hman chhunzawm zel tur a ni dawn a. Midang tana luanchhuahna Program kan neih tawh ah hian Blood Donation Camp te, De-Addiction Centre tlawh te, Orphanage Home tlawh te, Vantlang hmun tihfai hnatlang te neih a nih tawh bakah PM Modi-a'n mi retheite tana PM Schemes hrang hrang a siam dawngtute tlawhchhuahna hun te pawh neih a ni tawh bawk,” a ti a ni.