Mizoram-a siam pangang chi fir tha State pawnah thawn

Mizoram atanga siamchhuah Muga pangang chi fir tha (Basic seed) 200 disease-free layings chu nimin khan State pawnlam-a thawnchhuah turin Sericulture Director Lalrinawma chuan a vailiam a, heng Muga pangang chi fir tha 27000 vel tur hi khawipun turin Narayanpur, Assam-ah leh Rompara, Meghalaya-ah te thawnchhuah a ni.

Nipui lai hian phai khaw lumah Muga pangang te hi khawi hlawhtlin a harsa a. Mizoram-ah erawh nipui laiin khawi hlawhtlin a ni ta fo a; tun tumah pawh hian August thla-ah Thenzawl P3 Mugafarm atangin khawi hlawhtlin a ni leh a. Khawi pun zel atan Central Silk Board Office, Mizoram chuan Muga pangang tui te a siam a, a siamchhuah atanga pangang tui thenkhatte chu phai lamah mamawhna a san avangin Assam leh Meghalaya-ah te thawn-chhuah a lo ni ta a ni.

Central Silk Board hnuaiah hian Muga pangang bikah pangang tui siamchhuahna Unit hi North East State hrang hrang hmun 14-ah a awm a. Mizoram-ah Unit khat chu kumin 2026 atangin a awm ve tan a ni. 

Kumin nipui lai hian Unit 14 atangin Unit tlemte chauhin Muga pangang te an khawi hlawhtling thei a, chung zingah chuan Mizoram hi a tel ve a. Muga P3 Unit, Thenzawl a awm hi Chief Minister Lalduhoma leh Sericulture Minister Lalthansanga te hmalakna avangin kumin 2026 atang hian a function ve thei ta a ni. Mizorama Muga pangang khawitute tan P3 Muga Unit hi a tangkai hle dawn a ni.