Serchhip District High School Sports neih tan a ni

Serchhip District-a High School hrang hrang te infiamna-a an inelna, Serchhip District Secondary School Sports chu nimin khan Serchhip ah a hawnna neih a ni a, tunkar Ningani thleng a awh ang. Serchhip District Secondary School Sports hi Serchhip Sports Complex-ah a hawnna neiin Organising Committee Chairman David Laldintluanga chuan a hawng a, zirlai ten thutiam an lak hnuah inelna hrang hrang neih chhunzawm nghal a ni.

Tun tuma Serchhip District Secondary School Sports-ah hian Serchhip District chhunga High School 29 telin Serchhip Town chhunga High School 10 bakah khua khua atangin School 19 an rawn tel a, Intlansiak, Shot put, Long Jump, Volleyball, Football leh Judo bakah Mipa tan Kalchhet leh Hmeichhe tan Kawikah-ah te inelna neih a ni dawn a, nimin-a a hawnna neih a nih hma hian infiamna thenkhat ah chuan inelna an lo nei tan tawh a ni.