Ramhlun Sport Complex Rehabilitation Centre House Site Plan-a Land Pass semchhuah a ni
Land Revenue & Settlement Department bultuma Land Pass (Digitised Records of Rights) semna hun Ramhlun Sport Complex-a buatsaih ah hian Revenue Minister B. Lalchhanzova chuan Land Pass semna hun hi mipuite tan awlsam zawkna tur leh Office pan buai ngai lova anmahni kawtkai-a Land Pass te hlanna tura ruahman a nih thu a sawi a. Rehabilitation Centre hi kum 2013-a Ramhlun Sport Complex leh Ramhlun Vengthar leimin avanga chhiatna tuarte chhawm-dawlna turin sawrkarin Lalthansanga ram bigha 32.04 a leisak thu a sawi a. Master Plan siam niin chhiatna tuartute chu Category hrang hranga thenin, In hmun pek an ni tawh a; amaherawh chu hun rei tak chhung pass pek theih an nih loh thu leh, Local Council ten hmun thenkhat mimal hnena an lo khul tir nual avangin buaina hrang hrang a awm thu a sawi a. Heng buainate sutkian a nih theih nan hian December ni 8-19, 2025 chhungin GNSS Receiver hmangin survey tih that leh vek a nih thu a sawi bawk.
Re-Survey-ah hian Plot 146 hmuhchhuah a nih thu leh leimin tuar avanga ram pek 101 leh Thlanmual ram sahthlak leh ram siamremleh 26, a vaiin ram 127 te chu tun tumah hian Land Pass pek an ni ta tih Minister chuan sawiin, heng bakah hian Local Council, NGO leh Kohhran in mi an lei sak 15 te chu Land Lease-a siam zui tur a nih thu a sawi a, Dispute 4 awmte pawh chinfel mek a ni h thu a sawi a. Land Pass hi tunhma aia him zawk, changkang zawk leh bo thei lo a ni tih sawiin Minister chuan, LRS Department chuan mipuite banphaka awm turin theihtawp an chhuah zel tur thu a sawi bawk.
Bialtu MLA Dr. Vanlalthlana pawhin ram buai chinfel hna hun rei tak awh thin chu LR&S Minister leh Department thawktute hmalaknain rang taka chinfel zung zung tawh niin, thingtlang lama awm, Aizawl pan harsatte tan pawh awlsam zawkna turin chak taka hmalak a nih avangin lawmthu a sawi a. Ani bakah hian LR&S Director R. Lalthazuala leh Asst. Director of Survey (G) V. Lalrindika bakah AMC Corporator Vanlalfaka leh Local Council hruaitute pawhin thu an sawi a ni.