Mizoram-ah Thawk lama harsatna leh a kaihhnawih natna avanga thi an tam

Directorate of Economics & Statistics in nikum chhunga damdawi In-a thi a chhinchhiah zingah Thawk lama harsatna leh a kaihhnawih natna avanga thi 721 an awm.

Directorate of Economics & Statistics buatsaih Annual Report of Births & Deaths, 2025 leh Medical Certification of Causes of Deaths (MCCD), 2025 tarlan danin nikum chhunga Mizorama thih chhan langsar zual zingah, Thawk lama harsatna leh a kaihhnawih natna (Disease of the Respiratory system) 17.3 % leh Pumpui leh a kaihhnawih natna (Disease of the Digestive System) 15% te chu a hluar zual a ni a, nikum chhung khan damdawi In-a chhinchhiah chinah mipa 2,692 leh hmeichhia 1,454, an vaiin 4,146 an thi a, thawk lama harsatna leh a kaihhnawih natna avanga thi tam berin, 721 an ni a, hei hi zaa 17.3 a ni. Pumpui leh a kaihhnawih natna avanga thi 613 (a zela 15%) leh Disease of the Circulatory System vanga thi 574 (za zela 13.7%) te chu a tam zual a ni.

Annual Report of Births & Deaths 2025 bu-a tarlan a nih danin, nikum chhung khan Mizoram-ah nau piang 31,294 an awm a, heng zinga 15,751 chu mipa an ni a, hmeichhia 15,543 awmin hmeichhia aiin mipa 208 an tam a ni. Nikum chhung vek khan Mizoram-ah mitthi 10,055 an awm a, mipa 6,520 leh hmeichhia 3,535 a ni a, hmeichhia aia mipa thi tamna chu 2,985 a ni a, a zela 6.68 niin Nausen thi 263 leh thi sa a piang 69 an awm bawk.