Leihnuai hausakna haichhuak tura hmalakna thlirho

Mizoram-a tuialhthei zawnga leiverhna kawnga hmalakna hrang hrang kalpui dan thlirletna hun chu nimin khan neih niin hmalak zel dan turte pawh sawiho nghal a ni bawk.

Planning & Programme Implementation Department Committee Room-a thutkhawm hi Commerce, Industries, Geology & Mining Department Secretary, Dr. H.Lianzela IAS chuan kaihruaiin Mizoram chhunga leihnuai hausakna lakchhuahna tura tunhma a hmalakna hrang hrangte chuan beisei angin hlawhtlinna la hmu lo mah se, Ministry of Petroleum and Natural Gas, OIL, ONGC leh Mizoram Sawrkar hnuaia Commerce, Industries, Geology & Mining Department-te thawhhona leh tanrualna zarah hmachhawp duhawm tak a awma a hriat thu a sawi a. Thiamna thar, khawl thar leh inpekna thar nen thlirletna hun chu hmang turin kalkhawmte a chah bakah, Mizoram leh India hmarchhak State-te tana innghahna tham hmasawnna thlen thei tur hmachhawp ruahmanna siam tum theih turin a chah bawk a ni.

He thutkhawm ah hian Ministry of Petroleum and Natural Gas atangin Sohban Pathak, Additional Director General (Exp.), Directorate General of Hydrocarbons, Oil and Natural Gas Corporation Limited, Oil India Limited leh Indraprastha Gas Grid Limited hotute pawh an tel a, Directorate of Geology & Mining-a Joint Director Er. Lalremmawia chuan 'Sharing Findings from Field Inspection and status of Hydrocarbons Activities in Mizoram' tih thupui hmangin presentation a pe a. ONGC leh OIL atangin 'Indentification of Prospective Acreages for Future OALP Bid Rounds' tih leh IGGL atangin 'Updated Gas Infrastructure and Monetization Opportunities' tih thupui hmangin Presentation ngaihthlak a ni bawk a. Commerce, Industries, Geology & Mining Department-a Joint Secretary H. Lalchhandami chuan lawmthu sawiin hun a khar bawk a ni.

Mizoram-ah hian kum 2011 khan ONGC chuan lei verh hna kalpuiin tun dinhmunah ONGC Meidum leh Zanlawn-ah Oil Well an verh tawh a, OIL chuan Aibawk, Keifang leh Thenzawl-ah te hma an la tawh bawk. Hortoki khaw bula leiverhna ah hna kalpuina tura lirthei lian kal thei turin Chhimluangte Bridge thawmthat a ni thu te, a bik takin ONGC in kum 2011-2012 a Hortoki, Kolasib District-a Gas an lo hmuh tawhna hmun atanga km 2 a hlaah Exploratory Well thar an verh belhlehna tur atana regularisation leh ONGC Block No. AA-ONN-2001/2 extension-a nih theihna dan tur sawiho a ni a. Mizoram khawchhak lam Rabung leh chhim lam Tlabung bakah Pangzawl leh Thiltlang-ah te 'Gas Exploration' kalpui a pawimawh thu te leh Panisagar - Sihhmui Gas pipeline kalpuina tura hmachhawpte sawi ho a ni bawk.