Larsap leh MLDB te inkawm
Mizo Language Development Board (ML-DB) Chairman R. Lallianzuala leh Secretary Lalsangpuia te chuan nimin khan Larsap General (Dr) Vijay Kumar Singh chu Lok Bhavan-ah hmuin Mizo tawng tihhmasawn nana pawimawh hrang hrangte an sawipui a. Larsap General (Dr) Vijay Kumar Singh chuan Mizo Language Development Board hotute chu naupang tê tê leh hnam dang, Mizo tawng zir tîr ten dik taka an lam rîk theih dan tura ziak dan zirtir tha a tih thu a sawi a. Mizo Language Development Board-in lehkhabu chhuah kawnga an thawhpui atan Sahitya Akademi hotute lo biak a inhuam thu a hrilh bawk. Hei bakah hian Larsap chuan Mizo tawng hmangtute khawvel pumah an inzâr pharh zau êm êm tawh thu leh Mizoram chu India rama ziak leh chhiar thiam tamna ber State kan nih tawh thu sawiin, India tawngpui Eighth Schedule-a Mizo tawng sengluh thuai a nih theih nan theihtawp chhuahpui a tum thu a sawi bawk.