Khualzin tam zawk neih nan hmun hrang hrangah cheng vbc. 681.16 man infrastructure siam mek a ni
Ni hnih (2) awh ‘Mizoram Tourism Conclave 2026’ chu nimin khan Aizawl-a Assembly Annexe Conference Hall-ah neih leh niin he hun hi Chief Minister Lalduhoma chuan hmanpuiin tunhnaiah Sairang thlengin Rel a lo kal thu leh Mizoram chu tlawhpawh awlsam zawk a lo nih tak thu sawiin, “Khualzin tam takin min rawn tlawh zui ta a ni,” a ti a. Kumin ah pawh September thla thleng khan khualzin hi nuaih 6 vel kan nei tawh tih sawiin, “An pung zel turah kan ngai a, khualzinte thlenna tur kan neih ten an dawl zo lo lam a ni. Chuvang chuan Tourism lama Mizoram-a investment neih hi investor-te tan hmalakna tha tak a ni tawh a ni,” a ti a. Khualzin tam zawk kan neih zel theih nan sawrkar laipui nena tangdunin tunah hian hmun hrang hrangah cheng vbc. 681.16 man Infrastructure an siam mek thu sawiin, “Heng hmalakna kan kalpui theih nana sum leh pai min petu Ministry of Tourism te, Ministry of DoNER leh NITI Aayog te chungah kan lawm hle a ni. Kan state flagship Scheme Bana kaih atangin cheng vbc. 11.10 man tur kan duang mek bawk,” a ti.
Chief Minister chuan Tourism lama hmasawn zel hi kan tum avangin thingtlang lamah pawh hma an lak thu sawiin, “Mipuite nena tangruala kal (Community Based) kan uar a. Tunhnai lawkah pawh Bana kaih, CSR leh PM-JUGA atanga thawh tur Homestay thar 199 siamna tur kan hawng (launch) a ni,” a ti a. Khualzin an lo luh tam zel theih nana kan lungphum pawimawh pathum tarlangin, “Zo nun ze mawi tak tak te, khawtlang ralmuang leh faina leh thianghlimnate hi kan hmanraw tangkai an ni. Adventure lam thil Paragliding Competition te, Half Marathon te, Cycling leh hetiang lam thilte hian khualzin an ko khawm a. Kan ram hring mawi tak, kan tlang leh ruam hmuhnawm tak tak, kan lui, kan Wildlife Sanctuary te hi khualzin hip khawm thei kan ram rohlu an ni,” tiin heng thilte behchhana investment kalpui turin kalkhawmte hi a sawm a ni.
Mizoram Tourism Conclave 2026 hi Commissioner & Secretary, Dr. Lalrozama IAS chuan kaihruaiin Tourism Minister Lalnghinglova Hmar pawhin Mizoram-in Tourism lama hma a lakna te, remchanna tam tak a neih dan te a tarlang a. Mizoram sawrkar-a Commissioner & Secretary Vanlaldina Fanai pawhin Conclave an buatsaih chhan leh thiltumte sawiin, Dr. Lalrinchhani, DD, Tourism chuan Mizorama Tourism investment kalpui thatnate a sawi a. Chawhnu lamah Aijal Club-ah Business to Business Session neih a ni.