India tana Gold Medal hawntu Lalremsiami leh Lalthantluangi Aizawl-ah ropui taka lo lawm an ni
Asian Games 2026 neih zawh taka India tana Hmeichhe Hockey inelna a Gold Medal latu zinga mi Lalremsiami leh Lalthantluangi te chu nimin khan Aizawl-ah ropui taka lo hmuah an ni.
India Gold Medalist pahnih te hian nimin khan Lengpui Airport rawn thlengin sawrkar mi pawimawh ten an lo hmuak a, Lengpui-ah hian hun tawite hman a nih hnuah Aizawl rawn panpuiin Mualpui Salem Veng-a R. Dengthuama Indoor Stadium-ah Chief Minister Lalduhoma hovin lo lawm an ni bawk. He hunah hian Chief Minister Lalduhoma chuan Mizoram atanga Asian Games-a Medal la hmasa ber an ni thei chu chhuanawm a tih thu sawiin, Gold Medal-a Mizote'n Asian Games bul kan tan thei chu lawmawm a tih thu a sawi a, Oympic Games 2028-a tel tura an tlin zui avangin a lawmpui thu a sawi bawk. Chief Minister chuan Lalremsiami leh Lalthantluangi te hlawltlinna hlutpui zia lantir nan Mizoram State Incentive Cash Award Scheme atangin cheng nuai 25 ve ve leh Bana Kaih Scheme atangin cheng nuai 15 ve ve, a vaiin cheng nuai 40 ve ve Mizoram sawrkar atangin pek an ni dawntih sawiin, Incentive Cash Award sem hun pangaiah Mizo infiammi hlawhtling dangte rualin hlan tura ruahman a nih thu a sawi bawk.
Heng hlawhtlinna sang tak changa chawimawite hi Thenzawl-a Women Hockey Academy atanga zirchhuak an nih thu Chief Minister chuan sawiin, Mizote'n enkawlna tha kan dawn phawt chuan Hockey-ah theihna sang tak kan nei a ni tih a lantir thu a sawi a. Khawvel huapa India thatna game a nih bawk avangin Bana Kaih Scheme ‘Empowering Mizoram Sports’ hnuaiah Hockey hi game thlan zingah dah a nih thu a sawi bawk a. Lalremsiami chu infiamna huanga India ram chawimawina nopui, Arjuna Award dawng tura thlan a nih thu sawiin, Olympic Games lo awm turah India chu a qualify-pui thu a sawi a. Heng hlawhtlinna ropui tak tak a chan avang hian a hming chawia Hockey Ground siam an duh thu leh chumi atan chuan Kolasib Diakkawn GSA Playground chu an ruahman mek thu a sawi bawk.
Chief Minister chuan Infiamna lama sawrkar hmalakna hrang hrangte tarlangin, Sports Minister Lalnghinglova Hmar hmalaknain Sports Authority of India chuan cheng vbc. 6 sengin Thenzawl Women Hockey Academy-a Hockey Turf phah that hna an khawih tan tawh thu a sawi a. Academy-a awmte’n nakin zela an hman tangkai theih tur, Khum 30 awm theihna Hostel sak mek a nih thu leh Ministry of Minority Affairs atangin Hnahthial-a Hockey Ground siamna tur cheng vbc. 9.886 approval an hmuh tawh thu a tarlang bawk.
He hunah hian Sports Minister Lalnghinglova Hmar pawhin India hmeichhe Hockey Team ten kum 44 hnuah Asian Games-ah Champion an ni thei chu ropui a tih thu leh Lalremsiami chu India chakna goal thuntu a ni tih sawiin, Mizoram mai bakah India ram a tihmingtha hle a ni, a ti a. Sports Minister chuan Mizoram Sports Conclave 2024 atanga lo piang Empowering Mizoram Sports (EMS) atangin Hockey Centre-te siamin, Hockey lama hma an sawn nan theihtawp an chhuah thu a sawi bawk a, Aizawl-a ram pe thei an awm chuan Hockey Ground siam theih a nih thu a sawi bawk.
Nimin-a he hun hman hi Sports & Youth Services Department Commissioner & Secretary, K. Lalthawmmawia chuan kaihruaiin Hockey Mizoram-a President, K. Lalthlengliana pawhin thu a sawi bakah India tana Gold Medal latu Lalremsiami leh Lalthantluangi te pawhin thu sawiin lawmthu an sawi bawk a ni.
