Farmer Award dawngtu PC. Lalrinmawia chawimawina Neihdawn-ah buatsaih

Zonuna Kawlni (LENKAWL) • October 8, 2026 • Comments • Mizoram

Indian Institute of Horticultural Research, Bangalore (IIHR-NEH) atanga ‘Innovative Farmer Award’ dawngtu PC. Lalrinmawia, Neihdawn khua chawimawina chu nimin khan Neihdawn Community Hall-ah buatsaih a ni a, he hun hi KVK Khawzawl District-a Senior Scientist & Head, Dr. Malsawmkimi chuan kaihruaiin Indian Institute of Horticultural Research (IIHR) atanga he Award dawng thei tura PC. Lalrinmawia thawhrimna leh a inpekna a ropui zia sawiin, thawhrimna leh inpekna phena malsawmna awm haichhuak thei turin kalkhawmte a sawm bawk a ni.

PC. Lalrinmawia hian kum 2026 hian Tomato Arka Abhed variety chu Far huan, Lungding Zau-ah chingin, kung 5000 a enkawl a, heng atang hian kumin chhung hian Rs. 16,00,000 man a hralhchhuak a ni. Nimin-a amah chawimawina hunah hian Neihdawn VC Member Biaksanga pawhin an hmalak dante a sawi bawk.

He hunah hian mi 160 kalkhawmin Vanlalnunhlui, SMS (Horticulture), KVK Khawzawl chuan Thlasik thlai chi hrang hrang chin dan leh a enkawl dan a zirtir nghal a, ICAR-IARI atangin thlai chi chi hrang hrang semchhuah nghal a ni.