Employees' State Insurance Scheme chungchang Inhrilhhriatna hun buatsaih a ni
Sawrkar Laipui Ministry of Labour & Employment hnuaia Employees State Insurance Corporation (ESIC) hotute buatsaih ESIC Scheme chungchang zau zawka zirhona hun ‘Mega-Campaign on Employees State Insurance Corporation’ hi LESDE-a Special Secretary Saumyaketu Mishra chuan hmanpuiin India ram chu mi tinin an dikna chanvote an hmuh thiehna ram a nih angin, ESI chu eng hnaah pawh a ruaitute leh a thawk ten hamthatna tam tak ‘social security’ an nei a ni tih hre chunga ngaihngam taka hna an thawh ve theihna tura Sawrkar Laipui Scheme a ni tih a sawi a, mipui vantlangin zau zawka an hriat zel theih nan theitawp chhuah zel turin thawktute chu a fuih bawk a ni.
Employees' State Insurance Corporation (ESIC) hi Ministry of Labour & Employment hnuaia Statutory Body niin Mizoram bikah chuan Employees' State Insurance (ESI) Act chu Aizawl Municipality huam-chhungah kalpui turin December ni 1, 2015 khan hmalak a ni a. Aizawl District pum ah January ni 24, 2023 atangin kalpui tura hmalak chhunzawm a ni a. Tunah hian ESI Scheme hi Mizoram puma District zawng zawngah te kalpui tawh niin Vawiin hian Kolasib Branch Office pawh hawng tura inruahman a ni bawk.
ESI Scheme hi ESI Act 1948 in a huam hnathawktute zingah, damlohna/bawrhsawmna avang te, nau neih (Maternity) avangin emaw, hliam avanga hnathawk thei lo leh an hnathawhna kaihhnawiha nunna chan an awmin, anmahni bakah anmahni rinchhana khawsa (dependents) ten hamthatna chi hrang hrang- damdawi In-a inenkawlna, pension, ralna thilpek leh a dang thahnem takte an dawn theihna tura Sawrkar Laipui Scheme a ni a. ESI Scheme a inziahluh hi Sumdawng leh Mimal eizawnna vanga mi 10 leh a aia tam ruaite chuan tih ngei tur a niin heng aia tlem ruaite pawhin mahni duh thua tih theih a ni bawk a. He scheme chhawr tangkai tur hian hnathawkte chuan thla tin an hlawh atanga .075 percent an thawh tur a ni a, a ruaitute pawhin an mirawihte hlawh atanga chhuta 3.25 percent thawh ve bawk tur a ni.
ESI Scheme chuan sumdawnna (Establishment/Factory) hrang hrang Road Transport, Hotels & Restaurants, Newspaper, dawr chi hrang hrang leh Educational/Medical Institution bakah a dang tam tak, hnathawktu 10 emaw a aia tam chhawr reng rengte chu a huam vek a. Hnathawktu thlakhat-a Rs. 21,000/- leh a aia tlem hlawhte tan heng hamthatnate hi ruahman sak an ni bawk.