Department hrang ni mah ila, inzawmkhawm leh in mamawh tawn vek kan ni - Revenue Minister
Land Revenue & Settlement Department changtu Minister B. Lalchhanzova chuan nimin khan Kolasib Project Veng-ah Assistant Commissioner (Revenue) Quarters hawngin Revenue leh District Administration (DC) kal hrang chu thil fuh lo tak a nih thu sawiin, Minister a nih tirh ah Revenue Assistant Commissioner (Aizawl North leh South) thendarh a nih thu leh Champhai-ah pawh Assistant Commissioner Office thar hawn thuai a nih tur thu bakah Thenzawl-ah pawh sak tura peihfel a nih thu a sawi a. “Revenue hi hmuh theih leh langsar takin awm lo mah se, ram hmasawnna tura lungphum pawimawh tak a ni a. Hna kan chelh tawh chuan a thiam (expert) te ngaihtuah dan anga kan thawh a ngai a ni,” a ti a. Land Pulling System hmanga sawrkar leh ram neituten tangkawpa hmunhma an tihhmasawn theih nan ngaihtuahna sen a pawimawh thu leh, Revenue Department-ah chuan a chung lam atanga ruahmanna siam tawp aiin District Level atanga sawrkar finchhuah a pawimawh thu a sawi bawk a. “Eng Department pawh enkawl ila, kan thawh chhan chu mipuite rawngbawl hi a ni a. Kan vai hian Department hrang ni mah ila, inzawmkhawm leh in mamawh tawn vek kan ni,” a ti a ni.
He hunah hian khual zahawm leh Bialtu MLA, Lalfamkima chuan ZPM Sawrkar inrelbawl tirh kum khatna chu sawrkarin leiba rulh leh insiamrem nan a hman thu sawiin, “Chuti chung chuan hmasawnna kan hmu nasa hle a. Kolasib District-ah pawh hun reilote chhungin sawrkar hmalakna hmuh tur a tam a ni,” a ti a. Diakkawn Bazar leh Venglai Bazar-te pawh sak that tura ruahmanna awm tawh a nih thu leh Pangbalkawn atanga South Chhimluang kawng siamna tur Tender kalpui mek a nih thu leh hmalakna dang te a tarlang bawk.
He hunah hian Land Revenue & Settlement (LR&S) Secretary, Vanlalmawia leh FCS & CA Director, Lalthazuala bakah LR&S Director Lalhmansanga te pawhin thu sawiin, PWD Department atangin Technical Report ngaihthlak a ni bawk a. Report-a tarlan a nih danin Construction of Settlement Officer Quarters (Type-IV) hi cheng nuai 66.87 senga sak a ni a. Hna hi October 1, 2025-a tan niin thla 12 chhungin thawh zawh a ni.
Revenue Minister B. Lalchhanzova hian Kolasib-a Assistant Commissioner (Revenue) Office pawh tlawh nghalin Office hmunhma te a enfiah a, Department-a thawktute nen an inkawm nghal a. Minister chuan thawktute chu mipuite tana rawngbawltu an nih hre thar leh tur leh mipuite tana dawr nuam leh awlsam ni tura tan la turin a fuih a. Revenue hna chu ram hmasawnna atana ban pawimawh tak a nih avangin rinawm leh taima taka hna thawk theuh turin a chah bawk a ni.
Hemi hnu hian Minister chuan Vairengte tlawh lehin Vairengte SDO (Civil) hnuaia Revenue hnathawh tichak tura ruahmanna kalpui mekte a hmunah a endik a. Vairengte SDO (Civil) Office-a Revenue Staff-te awmna tur leh Record Room sakna tur hmunhma te chu PWD Chief Architect Official-te nen an en ho a. Vairengte Bazar hmuna Revenue Staff Quarters sakna tur ruahmanna pawh a hmunah a enfiah a. LR&S Department in mipuite tana banphak leh awlsam zawk an ngaihtuah thu sawiin, “District Hqrs. piah lamah pawh SDO (Civil) thuthmun zawng zawngah Revenue thuneihna pek vek a, Revenue Office changtlung taka siam vek tum a ni,” tiin a enchhin nan Vairengte leh Thenzawl te an thlan thu a sawi bawk.