Chief Minister in Hnahlan Darnam Veng-ah Multipurpose Hall sak thar a hawng
He Hall thar lawmna inkhawm Hnahlan Community Hall-a neih ah Chief Minister Lalduhoma chuan Hnahlan chu hun rei tak a lo khawsak tawhna khua, mahni khua ang maia a ngaih a nih thu sawiin, “Kan Hall hawn thar tual hi vaivut a la nih avangin Thal-ah a khu anga, Fur-ah a diak dawn a. Chuvang chuan a tual PCC na tur cheng nuai li (4) kan pe ang che u,” a ti a. “Hnahlan High School leh Higher Secondary School zirlaite Hostel sak nan cheng nuai 50 pek che u kan tum anga. Eklavya Residential School tuna Mizorama kan sak mekte hi an zawh a, a dang kan hmu leh thei a nih chuan Hnahlan-a dah kan tum ve bawk dawn nia,” tiin Hnahlan leh a chhehvel tana sawrkar hmalakna hrang hrangte a tarlang bawk a, Bialtu MLA H. Ginzalala pawhin he hunah hian thu a sawi bawk a ni.
Nimin vek khan Chief Minister hian Vanlalpari vawk vulhna hmun, HH Piggery a tlawh nghal a, Vanlalpari hian Handholding Loan Component cheng nuai 25 Mizoram Rural Bank kaltlanga an hmuh vanga lawmthu sawi nan Chief Minister hnenah hian CM RF atan a vawk vulh lai pakhat a lo pe a. Vawk pek hi a lo vulh chhunzawm anga, a hralh hunah a man zawng zawng hi Chief Minister Relief Fund-ah a chhunglut dawn a ni. Hei bakah hian Chief Minister hian Hnahlan Winery a tlawh bawk a ni.