Leimin avanga chhiatna thleng thin chungchang zirho
Leimin avanga chhiatna chi hrang hrang lo thleng thin pumpelh leh chhiatna a lo thlen thulha chhawmdawlna hna thawh dan tur zirhona ah hian District Bawrhsap Paul L. Khuma chuan he Seminar kaltlang hian mipuite hnenah ‘Hriatna Ralthuam’ inhlan tum a nih thu sawi a, he huna kalkhawm mipuite chu an thil zirchhuahte hmang tangkai a, khawtlang hma-sawnna atan leh hre lo zawkte hnena eng chhi darhtu nih tum theuh turin a chah a ni.
Nimin-a he hun hmann hi Serchhip Addl. DC, Dorothy Muansangi chuan kaihruaiin sawrkar Department hrang hrang hotute, Serchhip District chhunga khaw hrang hranga VC hruaitute, College zirlaite leh sawmbik mi engemaw zat an tel a, Mizoram University-a Department of Geology atangin Professor Dr. Laldinpuia chuan 'Structure and Nature of Slopes, Slope Instability' tih leh 'Mitigation and Preventive Measures' tih thupuite hmangin thu a sawi a; SDO (Sadar) Rebecca Laldinmawii Hrahsel-in SDRF/SDMF chungchang sawiin, Disaster kaih-hnawiha sum ruahman leh a hman dan tur hriat tur pawimawh chi hrang hrangte a sawi bawk a; Sub-Deputy Commissioner Vanthangpuia'n ‘Office Disaster Management Plans’ chungchang a sawi bawk a. Sawihona leh zawhna leh chhanna hun te hman nghal a ni bawk.
He huna tarlan danin Serchhip District hi Tlak-lung leh lung kelha (lungno leh keh hma) tamna a ni a, District area zaa 79 chuang mah hi lei hnuai tui, tuihna awm theihna a ni a; leimin leh lei nghet lo awm theihna a tam avangin In sa tur leh Construction work thawk tur te chuan mithiamte rawn nachang hriat a pawimawh thu te leh In sa turte tana hriat tur pawimawh hrang hrangte tarlan a ni bawk.