Chhimlam Rel kawng sawiho

Chief Minister Lalduhoma chuan nimin khan a Office-ah Indian Railway Chief Administrative Officer Anjani Kumar Maurya leh a thawhpui Railway mi pawimawh te kawmin Sairang leh Hmawngbuchhuah inkara Rel kawng kaltir an tum dan a thlirpui a. Chief Minister hian Mizoram a Railway lamin hma an lakna lama a rawtnate an ngaihpawimawh thin avangin Railway Minister Ashwini Vaishnaw chungah lawmthu a sawi a. He Rel kawng kal tur hi mipuite tana a tangkai thei ang bera a kal theih nan rawtna hi nei thin an nih thu a sawi bawk.

Railway hotute sawi danin Sairang leh Hmawngbuchhuah inkara Rel kawng hi Km 230.110 a thui ni turin an rawn duang a, Station hi 20 a awm ang a, Rel hi darkar khata kilometer 130 a chaka tlan theihna turin an hisap a ni. Rel Station hming leh a paltlang ram hmingte chu a ram neitu khaw hming dik tak zel puttir turin Chief Minister hian a chah a, engemaw han tihdanglam duh tlem azawng rawtna a nei bawk a ni. Chief Minister hi Lt. Col. Clement Lalhmingthanga MLA, Sudir Kumar, Principal Secretary leh sawrkar mi pawimawh dang ten an tawiawm a ni.