ADC harsatna sutkian sak turin CM leh Larsap ngen
Mizoram-a Autonomous District Council (ADC) pathum-a CEM te aiawhin nimin khan MADC-a CEM M. Laikaw leh EM thenkhat te chuan Aizawl Press Club-ah thuthar thehdarhtute kawmin, Mizoram-a ADC pathum te chu State Sawrkar in kum 2014-2015 thleng khan Non-Plan leh Plan-ah then sawmin sum a pe thin tih sawiin, 2015-2016 atangin 2023-2024 thleng Salary & Non-Salary then in a pe leh a, 2024-2025 atang chuan Grant-In-Aid (General) tiin pek a ni tih an sawi a. State sawrkarin a pek tur zât Allocation a siam zât leh a thensawm ang ângin ADC Budget te chu siam thin a nih thu leh a tlângpuiin 2023-2024 thleng Salary & Non-Salary atâna Allocation siam hi Salary-ah 92% atanga 96% vel leh Non-Salary ah 3% atanga 7% vel chauh a ni thin tih an sawi.
Mizoram-a ZPM an Sawkar hma 1st State Finance Commission (2015-2016 to 2019-20) kum 5 (nga) chhung salary-a DA, Annual Increment,Officer & Staff promotion, regularization te tân State Finance Commission recommendation a pek tel loh pawh sum indaihlohna chu RE-a pek an nih thin thu sawiin, “Vanduaithlak takin kum 2021-2022 to 2025-2026, 2nd State Finance Commission recommendation period ah chuan 2022-23 Financial Year bâk chu ZPM Sawrkar hnuah ADC te hnenah RE pek an ni lo hian ADC a thawktute, Kohhran leh mipui ah harsatna tam tak a thlen a ni,” an ti a. Sixth Schedule hnuaia 'Constitutional Body' an nih laia State Department pakhat ang leka ngaih an ni thin chu dik lo an tih thu sawiin, Sum leh pai chungchangah ADC pathumte hian harsatna lian tak an tawh mek thu leh tun dinhmunah MADC in cheng nuai 2,588 chuang, LADC in nuai 6,992 chuang leh CADC in nuai 6,377 chuang hlawh pek tur ba an neih mek thu an sawi a. Mizoram mipui 16% awmna an nih laiin Fund 4% chauh an hmuh thu leh an Budget 90% chu hlawhah a kal ral thin thu an sawi a ni.
Heng bakah hian ADC-a Chairman (Legislative) leh Council Court President (Judiciary) te chu Council-a Head te an ni a. CEM te chu Article 16-ah State-a MOS Rank niin Chairman/Deputy CEM te chu Article 17-ah MP Rank, Executive Member, Deputy Chairman te chu Article 18-ah MLA Rank, MDC te chu Article 20-ah Chairman MPSC, Lt. Gen, State Information Commissioner rank a dah an ni tih sawiin, Mizoram Sawrkar-ah entitlement siam sak turin vawi tam an thlen thu leh tun thlengin siam sak an la ni lo tih an sawi bawk.