ZPM in hruaitu thar an nei dawn tih Minister in a sawi
Nimin-a ZPM chhung Inkhawm ah hian Home Minister chuan hruaitu thar an neih dawna thu leh an uluk thu sawiin, “Kan thukhawm zing hle, Party leh sawrkar tana tha ber tura rin kan thawhkhawm a, kan rel chhuak tha viau nghe nghe a ni,” a ti a. “Kan danglamna pakhat zinga mi chu ZPM-in Leader kan nei hi a ni a, hetihlai hian Leader ber party hruaitu nih theih loh kha a fel lo hle a ni. Chief Minister leh Party President kawp a thatna leh that lohna a awm, kawp loh kan enchhin tawh a, kawp kan enchhin leh ang,”a ti.
K. Sapdanga chuan kum 2023 November ni 8-ah vote thlakin kum 2028 November vel tho hi inthlan leh hun a nih hmel tih sawiin, “Kum hnih leh thla khat vel inbuatsaihna hun kan la nei. Kum 2 kan la neih chhung hian kan pung ang nge kan hnawt tiau ang? Party hruaitute leh Worker te kan pawimawh ber a, a inel te chu party-te kan ni a, kan tawngkamah leh kan hnathawhah a lang dawn a, mark petu erawh mipui an ni leh dawn. Kan velah thalai tam tak an awm a, ram rorel dan kalphungah an duhtui hle. Kan namnul a thiang lo. Pathian hnenah kan tawngtai anga, sawrkar leh party lungrual takin thawkrim i la, ram rawngbawlna hun tha hi Pathian in min pe leh ngei ang,” a ti a. “ZPM hi thahnemngai taka min tawngtaisaktu kan la nei tam a, tun dinhmun kan enin Kohhran leh mipuite hian min la tan hlein a lang a, duhthlan tur dang an la nei lovin ka hria.” a ti bawk.
ZPM thuchhuah in a tarlan danin nimin a ZPM Chhung Inkhawm ah hian ZPM party zawm thar Lawmawma, DEO (Rtd.) Serchhip leh Tuamliana, SDEO (Rtd.) Serchhip te chu K. Sapdanga hian ZPM Party-ah a lawmlut bawk.