Kumin-a ASF vanga Vawk thi leh suat 2978 awm tawh
Serchhip District-a ASF hri leng chu ziaawm chho tawh viau mah se Serchhip District-ah ASF vanga Vawk thi a la awm zeuh zeuh a, Chhuanthar Tlangnuam-ah nimin khan ASF vanga Vawk thi pakhat chhin-chhiah belh leh niin Chhuanthar Tlangnuam-ah hian kumin chhungin ASF vanga Vawk thi 39 a awm tawh bawk a ni. Heti hian kumin chhung hian Serchhip District-a Veng leh khua 21-ah ASF vanga Vawk thi leh suat awm tawhin chhungkaw 698 in an tuar tawh a, ASF vanga Vawk thi hi a vaiin 1891 niin Vawk 1087 suat a ni tawh bawk a, kumin chhunga Serchhip District-a ASF vanga Vawk thi leh suat hi a vaiin 2978 a tling tawh a ni.
Serchhip District chhunga khaw hrang hrang zingah Thenzawl khua chu ASF hri leng tuar na ber niin chhungkaw 168 in tuar tawhin Vawk thi 501 a awm bakah Vawk 141 suat a ni tawh bawk a, Chhingchhip khua in dawtin Vawk thi 230 leh Vawk suat 271 a awm tawh bawk a, chhungkaw 70 ten hri leng hi an tuar a ni. Ser-chhip khawpui chhung bikah chuan ASF hri leng vanga Vawk thi leh suat hi hun engemaw chen a awm tawh lo a ni.