Union Minister of State for Youth Affairs & Sports-in Saitual tlawhin District thuneitute a kawm
Niminpiah-a Mizoram a rawn thlen hnuah Union Minister Raksha Nikhil Khadse-i hian Saitual hi pan nghalin Saitual DC Conference Room-ah sawrkar Department hotute a kawm a, sawrkar Department hotute chu tualchhung mi an nih angin tualchhung mite tana tan la lehzual turin a fuih a, Central Scheme hrang hrangte mipuiin an hlawkpui lehzual theih nan chak lehzual a hma la turin a chah a. Mizoram chu Organic Farming-ah a san thu sawiin, mumal taka thlai leh thei tharte chu sawngbawl hna (food processing) kalpui a nih chuan ramdangah hlep tam lehzuala an thawnchhuah theih a beisei thu a sawi bawk.
Union Minister chuan naupangten School an kal laia an theihna te haichhuah a nih theih nan infiamna lama inrelbawlna (sports infrastructure) tihhmasawn a tul thu sawiin, ruihhlo tawlhruk avanga Mizoram buaina chu a vei thu sawiin, thalaiten ruihhlo lama harsatna an tawh loh nan sawrkar program 'Mera Yuva Bharat' kaltlangin thalaiten ruihhlo do kawngah ke pen se a duh thu a sawi bawk a. Heng hmalakna thlirletna an neiha an minute te hian Prime Minister Office a thlen thin avangin sawrkar Official-te chu ngai pawimawh a, data lakkhawm leh meeting inpuahchah kawngah tan la thar turin a chah bawk a ni.
He thutkhawm hi Saitual Bawrhsap Srinivas Sadi chuan kaihruaiin Saitual District Head of Office-te bakah District chhunga Sports Association aiawhte telin Union Minister hnenah hian Sports lama an mamawh te thlenin, thalaite tana sawrkar laipui hmalakna hrang hrang avanga an lawmna te an tarlang a. Bawrhsap chuan Saitual District chanchin leh sawrkar Department hrang hrangte hmalakna tarlangin, Saitual SP Vivek Kumar Maurya pawhin kum kalta chhunga an ruihhlo man zat te a tarlang a, Saitual District chu State leh ramdang nena ramri nei an nih avangin ruihhlo tawlhruk an man nasat thu a sawi bawk.
Union Minister of State for Youth Affairs & Sports Raksha Nikhil Khadse-i hian nimin khan Saitual District Hospital tlawhin, Hospital dinhmun leh hmalak mek te a enfiah a. Khum 50 awm theihna tur District Hospital Complex sak meka an hnathawhte chu enin, hna hmabak a la tam thu leh huntiam chhunga zawh a nih theih nan tan la turin thuneitute a chah a. OPD building thar sak mek a en bakah District Hospital hmanlai mek chu a tlawh leh a, Hospital Staff-te pawhin an mamawhte leh an harsatnate chu Union Minister hnenah an thlen nghal a ni.