Serchhip District-a NH-02 siamthat dan tur sawiho a ni
He sawihona hi Bawrhsap Pisa-ah neih niin NHIDCL leh an hnuaia Contractor KRAM Infracon Pvt. Ltd. hotute an tel a, tarlan tawh thin angin tunhnaiah Serchhip District chhunga kaltlang NH-02 thawmthat hna hi nasa taka thawh niin Fur ruahtui a hul veleh, tuna Temporary-a kawng khuar hnawhna zawng zawngte hi phawrhchhuak leh vekin, a nih dan tur (Technical guideline) ang thlapin Permanent Black Topping chu tih leh tur a ni dawn a. Nimin-a thutkhawmah hian hna thawh dan tur bakah hunbi tuk (timeline) siamin, hemi hun chhunga tha tak leh chak taka hnathawh a nih theih dan tur te an sawiho a ni.
Serchhip Bawrhsap chuan kawng siam hnathawhte hi District Administration bakah khaw-tlang hruaitute leh District mipuite nen tangrualin ngawrh tak leh uluk taka vil zui reng a nih tur thu a sawi. A tul dan ang zela Serchhip by-pass road Lei pawh thawmthat leh a hmunhmate endika, vilzui dan tur chungchangte pawh sawiho a ni bawk.