TEACHERS’ DAY PUALA THUCHAH
TEACHERS’ DAY PUALA THUCHAH
- Paul L. Khuma,
Serchhip District mipui zawng zawng te, Serchhip District Administration aiawhin Zirtirtute ni chibai ka buk a che u.
Kan hriat theuh angin Dr. Sarvapali Radakrishnan-a pian ni September 5 chu India ram pumah Teachers' Day atan a puan a ni a; amaherawhchu kumin hian September ni 5 hi Holiday a nih avangin September 3 ah he ni lawmna hi kan hmang a ni a; he ni lawmawm takah hian Serchhip District-a Zirtirtu zawng zawngte zahna chibai ka buk che u a ni.
Zirtirtute hi kan ram dintu 'Nation Builder' in ni a, ram hmasawnna innghahna bulthum in ni tih hi Vawiin-ah hian hre thar leh theuh turin ka duh cheu a, school-a kan zirlai naupangte kan zirtir dan leh an rilru leh an nun kan kaihhruai danahte hian, kan ram hmakhua hi a innghat tak meuh meuh a ni tih hi i hre thar leh ang u.
Mi thiamte chuan thu mawi leh awmze nei tak mai hetiang hian an lo sawi tawh thin a, ‘The destiny of India is now being shaped in her classrooms’ tiin, a awmzia chu India ram hmakhua leh kan awm zel dan turte hi, Classroom-a kan inzirtirna ah te hian a lo innghat reng tawh a, ram ropui lo chhuahna hmun hi Parliament emaw, Secretariat emaw a ni ber lo a, 'Classroom-ah a in tan a ni’ an tihna tluk a ni.
Zirtirtute hi kan ram hmakhua innghahna, kan naupangte chhertu in nih avangin in pawimawh em em a ni tih hi Vawiin-ah hian hre thar leh theuh turin ka duh cheu a; chutih rual erawh chuan Dr. Radakrishnana ngei pawhin-a a ngaih pawimawh em em thil pakhat hi zirtirtuten hre thar leh theuh ila ka duh a, chu chu “The true teachers are those who help us think for ourselves” a tih hi a ni. ‘Zirtirtu tha dik takte chu mahnia ngaihtuahna zau zawka hmang thiam tura min zirtir thintute hi an ni’ a ti a, chutiang chiah chuan kan naupangten hma an sawn lehzual theih nan, rote learning/blind byheart-hmanga an zirlai bu ami ngawr ngawr zirtir mai lovin, hriatthiamna nei tur leh mahnia ngaihtuahna, ril zawka hmang thiam thei tura zirtir fan fan thin hi Zirtirtu kan nih anga kan duty, kan mawhphurhna a ni tih Vawiin-ah hian hre thar leh theuh ila a tha awm e.
Kan hmuh leh hriat angin kan District, Serchhip District pawhin kawng hrang hrangah hmasawnna duhawm tak tak kan nei thin a, heng kan hmasawnna hrang hrangte leh Vawiin-a kan dinhmun, India rama Literacy rate sang ber kan nih te, District hmasawn berte zinga kan awm theihnate hi kum tam tak chhunga in lo thawhrim tawhna avang a ni a. Inzirtirnate avangin kan naupangte an lo fing a, an lo fel a, ram leh hnam tan an dingchhuak mek a ni a, in thawhrimnate hi ram hian a hmu a, chuvangin beidawng ngai suh u. In chherchhuah in zirlai naupangte hian kan District pumpui siam thatna kawngah a tha zawnga danglamna nasa tak an thlen thei a ni tih hi hre reng turin ka duh cheu a ni.
Naupangte pawh, in zirtirtute zah nachang hre thar leh ula. An hauh che u pawhin inthatna tur a ni tih hre reng thin ang che u. Chutiang zelin nu leh pa te pawh, kan fate support (thawhpui) tlat ila, kan zavaiin i tangrual ang u.
Vawiin ni ropui takah hian hriselna leh damna lo nei zel turin duhsakna ka hlan cheu a, In thawhrimna zawng zawngah lawmthu ka sawi e.
Ka lawm e. Jai Hind.