Departmental Summit on Water programme-ah Minister tel
He Summit hi Ministry of Jal Shakti buatsaih niin Prime Minister Narendra Modi leh Union Minister for Jal Shakti, CR. Patil te chuan an telpui a, he Summit-a Minister thu sawi tura sawm tlem te zingah PC. Vanlalruata leh Prof. Lalnilawma te hi an tel a ni. IWRD Minister PC. Vanlalruata chuan Mizo-ram-in ruahtui kan dawng tha em em a, chutihrual chuan tlangram kan nih avangin kan ruahtui dawn tam tak hi a luangral leh mai thin a; ruahtui khawl (rainwater harvesting) lamah theihtawpa hma an lak mek thu a sawi a. Ruahtui kan khawl that theih chuan Agriculture pawhin nasa takin hma a sawn thei ang tih sawiin, chutiang tur chuan tunah project hrang hrang DPR te buatsaih mek a nih thu leh Ministry of Jal Shakti lam pawhin lo ngai pawimawh thei hram se tiin a ngen nghal bawk a. Mizoram tana tui kaihhnawih project tam zawk chu Brahmaputra Board kaltlanga buaipui thin a nih thu leh duh aia hna a kalmuan thin avangin Brahmaputra Board tihchangtlun a tul tih a sawi bawk.
PHE Minister Prof. Lalnilawma pawhin Mizoram-ah tuihna a tlem zel nia hriat a ni a, chu chu ngai pawimawhin PHE Department chuan Mizoram-a NGO lian ber YMA te nen tang-kawpin MoU ziaka hma an lak mek thu a sawi a. Kan tuihna te siam tha leh turin Central Sawrkar leh State Sawrkar te tanrual a pawimawh thu sawiin, PHE Department hmalakna bakah Rural Development & Administration department atang pawhin VB G RAM G scheme leh PMKSY Scheme te atangin tuihna enkawlna leh siamthatna hna hi an thawh mek thu a tarlang bawk.