Taxation in kumah chhiah Rs. 6,23,30,54,007 hmu

Sawrkar kum kal mek 2026-27 ah Mizoram sawrkar chuan Taxation Department kaltlangin thla 5 chhungin Chhiah cheng vbc. 623 leh nuai 30 a hmu tawh a; kawngpui enkawlna tur leh Social Service atana lâk Cess chi hnih hmangin cheng vbc. 26.19 ve ve hmuh a ni tawh.
Taxation Department-in thla tina Chhiah an hmuh zat an tarlan danin, kumin April atanga August thla chhung khan Goods & Services Tax (GST), Profession Tax, Sales Tax, Road Maintenance Cess, Social Infrastructure & Services Cess, Entertainment Tax leh thildang atangin chhiah cheng vbc. 623.30 hmuh a ni a. Chhiah hmuh tamna ber GST atangin cheng vbc. 421 hmuh niin, chhiah hmuh zawng zawng atangin za zela 67.55 a tling. Thla 5 chhung hian Mizoram saswrkarin Petrol leh Diesel atanga kawngpui enkawlna atana chhiah a lakna - Road Maintenance Cess leh hriselna leh zirna kaihhnawiha vantlang hmasawnna siamna tura Chhiah a lakna Social Infrastructure & Services Cess atangin cheng vbc 26.19 ve ve hmuh a ni tawh a; belhkhawmin cheng vbc. 52.38 a tling a ni.

Taxation Department in chhiah an hmuh dang hi Profession Tax atangin Rs. 4,69,56,199, Sales Tax atangin Rs. 1,45,18,29,742 leh Chhiah dang atangin Rs. 1,02,844 a ni a, a vaia an Chhiah hmuh tawh chu Rs. 6,23,30,54,007 a ni.