Social Welfare leh Central YMA ten ruihhlo do inzirtirna kalpui tur sawiho
He sawihona hi Social Welfare Department Secretary Lalzarmawii kaihhruaia neih niin sawrkar laipui-a Ministry of Social Justice & Empowerment hnuaia Awareness & Capacity Building under National Action Plan for Drugs Demand Reduction Scheme kalpui dan tur sawiho a ni a. Thutkhawm kaihruaitu SWD Secretary Lalzarmawii chuan Ministry of Social Justice & Empowerment atanga kan ram leh hnam mamawh em em - ruihhlo chungchang inzirtirna atana hman tur sum thahnem tham tak Central YMA ten an dawng mai tur chu lawmawm a tih thu a sawi a, tangkai tak leh awmze nei taka hmang turin Central YMA hruaitute chu a chah a. Sawrkar laipuiin zawm tura a tihte tha taka zawm chunga tangkai taka an hman Central chuan a tanpui chhunzawm zel a beisei thu a sawi bawk.
MoSJE atang hian Awareness kalpuina atana Central YMA sum hmuh tur hi First Instalment sanction fel tawh niin Central YMA Account ah pekchhuah mai tura peihfel a ni tawh a. Inzirtirna kalpui tur atan hian Master Trainer te inruatin Standardised traning module siam a ni ang a, Mizoram chhunga khaw 700 chuang tuamchhuah tura ruahman a ni a. State Level, District Level leh Village Level-ah hmalak a ni ang.
He inkawmhona ah hian Social Welfare Director Vivek Kumar Tripathi IAS pawhin Central YMA te beihpui-thlak turah kawng engkima puihbawm an huam thu leh mamawhna an neih apiangah Central YMA hruaitute chu an puih zel tur thu a sawi a. Central YMA hruaitute chuan Ministry of Social justice & empowerment leh Mizoram Sawrkar hnuaia Social Welfare Department te chungah YMA Kumpuan - Ruihhlo Do kawnga hmalakna tur sum an dawng mai tur chu lawmawm an tih thu sawiin, daihzai tak leh tangkai taka hman ngei an tum thu an sawi a. He hunah hian Social Welfare Department hotute bakah Central YMA atangin Treasurer Er. H. Duhkima, Asst Secretary. SF. David Ngursangzuala leh Finance Secretary MS. Ralte te an tel a ni.