Serchhip-a PMAY-U 2.0 hnuaia dilna lut enfiah a ni
Sawrkar laipui rua-hman anga khawpui chhunga chengte tana Insak tanpuina, Pradhan Mantri Awas Yojana (Urban) 2.0 - Housing For All 2nd Phase hnuaia dilna lut te ngaihtuahin nimin khan Serchhip Bawrhsap Paul L. Khuma kaihhruaiin District Level Committee on PMAY-U 2.0 chu Serchhip DC Meeting Hall-ah an thukhawm a, he hunah hian PMAY-U 2.0 Phase-2 atan Serchhip Town-ah Beneficiaries quota/allotment 125 a awm thu tarlan niin dilna (applications) lut zawng zawng chu 230 a nih thu tarlan a ni a; heng zingah hian dilna fel tawk lo leh pawm loh (reject) 65 awmin, dilna rintlak (valid applications) 165 a awm a ni.
Heng dilna lut hrang hrangte hi a hmuna endikna (field verification) leh Gram Sabha te neih hnuah heng valid application 165 atang hian mi 125 te chu tanpuina dawng tura recommend an ni a, an zinga mi 40 te chu Eligible List a dah an ni bawk. Serchhip Town huamchhunga VC te zingah P&E Veng atangin recommend tam berin 25 an awm a, Chhiahtlang North-ah 20; Darnam-ah 15; Chhiahtlang South leh New Serchhip North-ah 13 ve ve; New Serchhip South-ah 8; Serchhip Dinthar, Serchhip Chhim Veng, Ser-chhip Chanmari leh Serchhip Hmar Veng-ah 6 theuh; Vengchung-ah 4; Serchhip Kawnpui-ah 2 leh Serchhip Field Veng-ah pakhat recommend an ni a, Serchhip Kawnpui North-ah an awm lo thung a ni.