MP (LS) in Press Club a tlawh
Aizawl Press Club-a MJA Member te nen an inkawmna ah hian Lok Sabha MP chuan Pathian leh mipui zarah kum 2 leh a chanve vel zet MP a ni ve ta tih sawiin, ram rawng an bawlnaah thil thar tam tak zir tur a neih thu leh theihtawp a chhuah ve mek zel tih sawiin, Mizoram tan theihtawp a chhuah tur thu a sawi a. Amah chu ZPM Party mi ni mah se, Mizoram mipuite MP a nih thu sawiin, thil thlen dan leh a hmun leh a hun a zirin a changin Kristian MP te, Minority MP leh Northeast MP nih changte an nei thin tih a sawi a. Lok Sabha bikah MP zingah Kristian 22 an awm a. Ramchhung hmun hrang hranga Kristian-ten harsatna an tawh changin a theih ang anga hma an lak thin thu leh an inhmuhkhawm ve thin thu a sawi bawk.
Lok Sabha MP Richard Vanlalhmangaiha chuan, MP-te chu State aiawh an nih angin Sawrkar laipui an dawrna ah hmelhriat leh thiantha neih a pawimawh thu sawiin, Kumtin MP Fund an dawn bakah inthianthatna hmanga Fund pawhchhuah tur tam tak a awm ve thin thu a sawi a, hemi kawngah hian theihtawp chhuah a tum thu leh Mizoram chanpual bakah Sawrkar laipui atanga sum tam thei ang ber pawt chhuak tura hmalak a tum thu a sawi bawk.
MP a nih hnuah a hmalakna zarah Mizoram Sawrkar-in Sawrkar laipuia Project a thehluh tihhlawhtlin mai loh (Project Pending) cheng vbc. 668.52 hu pek an ni tawh tih pawh sawiin, hei bakah hian PMGSY-I hnuaiah GST Liability cheng vbc. 150 vel pek chhuah a ni a. Hei phei hi chu Project tihtawp tawh, a hmalakna avanga hawn thar leh a ni tih sawiin, National Highway 306 A, Vairengte - Vaitin inkar kawng siamna tur cheng vbc. 99.78 pawh tunhnaiah pek an ni tih a sawi a. MP Fund chu dik leh daihzai thei ang bera kalpui tum a ni tih sawiin, Mizoram-a khaw 94-a zirna In hrang hrangah MP Fund a pe tawh tih a sawi bawk.