AMPEDA in an thilphut an hnuklet; MZP in hmalakna titawp rih

All Mizoram Petroleum Dealers’ Association (AMPEDA) hruaitute leh MZP General Hqrs. hruaitute chu nimin khan Home Secretary Vanlalmawia kaihhruaina in a Pisa-ah an inkawm a, he hunah hian tunhnaia harsatna an tawh mek leh hun lo la awm tura a pumpelh dan turte sawihoin AMPEDA chuan naktuk, September 17, 2026 atanga Mizoram pum a Petrol Pump khar an tum chu an thulh (call-off).
MZP thuchhuah tarlan danin Mizoram Home Secretary Pu Vanlalmawia, IAS kaihhruaina hnuaia vawiin September 16, 2026-a All Mizoram Petroleum Dealers Association (AMPEDA) leh Mizo Zirlai Pawl (MZP) hruaitute thukhawmin a rel angin, AMPEDA chuan MZP laka an thilphutte an hnuklet leh ta a, September 17-a Petrol Pump khar an tum tawh pawh an thulh ta a ni a. Naktuk September 17, 2026 atanga Mizoram chhunga hnam dang enkawl leh hnamdangte thawhna Petrol pump khar tura MZP Headquarters, Sub-Headquarters, Branch leh Hnampual zirlai pawl a an thawhpuite hnena hriattirna MZP-in a lo tihchhuah tawh chu Mizoram Sawrkar ngenna avang leh  mipuite hmakhaw ngai chungin tihtawp rih a ni tih tarlangin, heng hnamdang pump enkawlte chungchangah hian MZP chuan a tul angin hma ala la chhunzawm zel dawn tih an tarlang a ni.

MZP chuan Hnam dang Mizo hming hawh leh hnam dang (vai) sumdawng an rawn pung chho zel chu a vei takzet tih an thuchhuah ah hian tarlangin, "MZP Assembly lo awm turah pawh, 'Mizo hming hawha hnamdang sumdawn tirte na taka hremna dan Sawrkarin siam se, a tul anga dapchhuah thin ni rawh se' tih chu rel tur zingah dah tel niin, a tul angin Assembly rorel bawhzui hian MZP chuan hnamdang sumdawngte dapchhuah kawngah hma ala chhunzawm dawn a ni," an ti.

Hei bakah hian MZP chuan, Mizoram leh hnam himna atan theihtawp a lo chhuah tawh thin tih tarlangin, "Kan ram kan hnam a him zel theihna turin hma a la chhunzawm zel dawn bawk a. Mizo mipuite pawh sum leh paia hlawkna ringawt um lova, kan ram himna leh kan hnam damna tur atan kan hming leh ram te hnamdang hawhtira, sumdawnna atan hman tir lo turin a ngen a. A tul anga dapchhuah kawngah Zoram mipuite thawhpuiah a sawm a, abik takin Village/Local Council leh tlawmngai pawl hrang hrangte a sawmin a ngen a ni," an ti a. Sumdawnna atana mahni hming hawh tir mekte pawh ram leh hnam a lo him zawk theih nan hnamdang an thawhpuina titawp vek turin MZP chuan a ngen nghal bawk a ni.