Serchhip District-a Progress Partner thlanchhuah mi 176 te hnenah CM Special Package sem a ni
Serchhip DC Pisapui Hall-a hemi puala hun hman hi Serchhip Bawrhsap leh District Level Monitoring Committee-a Chairman, Paul L. Khuma chuan hmanpuiin Progress Partner thlanchhuah te fuihna thu a sawi a. Progress Partners te chu sawrkarin duhsak taka a thlante an nih thu sawiin, ram economy innghahna la ni thei tura beiseina leh rinna nena thlir an nih thu a sawi a, rinawm taka an tih tur theuhte ti tura fuihin, Concerned Department tinte pawh an hnuaia Progress Partner-te chu taima taka thawhpui a, tha taka enzui reng turin a chah bawk.
He hunah hian District Level Monitoring Committee-a Member Secretary leh SDO (Sadar) Rebecca Laldinmawii Hrahsel hnen atangin Serchhip District-a Hand Holding Scheme hnuaia CM Special Package-a hmalak dan ngaihthlak a ni a; he huna tarlan a nih danin CM Special Package Phase-II hnuaiah grant hi March 24, 2026 khan Progress Partner mi 30 te hnenah Rs. 15,00,000 sem lo ni tawhin, May 20, 2026 khan mi 47 te hnenah Rs. 23,50,000 sem a lo ni tawh bawk a; nimin September 15, 2026 khan mi 176 te hnenah Rs. 88,00,000 sem leh a ni a, tanpuina sum hi DBT System hmanga sem niin direct-in Progress Partners te Bank Account-ah pawisate hi thun thin a ni a. Pawisa te hi a ni lo zawnga an hmang a nih chuan laklet sak emaw, bungraw laksak emaw te a hrem theih an ni bawk.
Nimin-a he hun hman ah hian Concerned Department hotu theuhte hnen atangin CM Special Package Grant kalphung inhriattirna leh infuihna thu ngaihthlak a ni a; DIPR Serchhip ten CM Special Package kaltlanga hlawhtlinna lo chang tawhte ‘Success Story’ an buatsaih chu thlirho ni bawkin SDC Vanthangpuia’n lawmthu sawiin hun hi a khar a ni.
Tun tuma CM Special Package Grant dawngtute hi Department 7 hnuaia mi te niin AH & Vety Department hnuaiah tam berin mi 63 an awm a, Commerce & Industries Department hnuaia mi 47, Horticulture Department hnuaia mi 44, Agriculture Department hnuaiah mi 7, Fisheries Department hnuaia mi 4, Sericulture Department hnuaiah mi 3 leh Tourism Department hnuaia mi pakhat te hnenah CM Special Package Rs. 50,000/- theuh sem an ni.