RTI hmanga inremna dilna pechhuak turin hriattir

Mizoram State Chief Information Commissioner (CIC) chuan Mizoram Universal Health Care Scheme (MUHCS) chungchanga Mizoram Sawrkar leh Synod Hospital inremna RTI Act hmanga a dilna chu September 23, 2026 aia tlai lo ah pechhuak turin MUHCS-a SPIO & Finance Officer chu a hriattir.

State Information Commission chuan RTI dilna hi mipui scheme kalpui dan leh mipui sum hman dan hriat duhna a nih avangin mipui tana tangkai tak a ni tih sawiin, Third party, Synod Hospital chu ngaihdan sawina hun pek a nih hnuah RTI Act hmanga zawhna zawttu in hriat duh a neih pekchhuah chungchangah sawiselna an nei lo a ni.

Gauhati High Court-in he thil a ngaihtuah laiin, he inremna hi mipui sum leh mipui enkawlna tur sawrkar scheme a nih avangin mipui hriat chianna kawngah mipui hamthatna a awm tih chiang takin a lantir a. Chuvangin danin information pek khapna awm mah se, mipui hamthatna chu a chungnung zawk tih chu Commission chuan a thutluknaah a tarlang.

SIC chuan MUHCS SPIO & Finance Officer chu man chawi ngai loa RTI Act hmanga diltuin a hriat duh zawng zawng chu September 23, 2026 aia tlai loah pe turin a hriattir. A pek tawh document zawng zawng nen compliance report pawh Commission hnenah hriat atana thawn tura tih a ni bawk.

Tarlan tawh angin, State Information Commission-in thutlukna a siam hmasak chu Mizoram sawrkar chuan Gauhati High Court-ah khingletin, Court chuan third party-in an ngaihdan sawina hun pek loh chungchang te leh appeal tur hmun Order-ah tarlan tel loh chungchangte ngaihtuahin, dan hmanga enfiahna a paltlang zo lo a ni tih a sawi a ni.