Kumin-ah lirthei dan bawhchhiat vanga pawisa chawitir mi 9,508 an awm tawh

Kumin January thla atanga niminpiah, September ni 15 thleng khan Mizoram-ah lirthei dan bawhchhiat avanga pawisa chawi tir mi 9,508 awmin an pawisa chawi tlingkhawm chu Rs. 94,01,900 a tling tawh a ni.
Akashvani Aizawl News-in Aizawl Traffic Police atanga thu a dawn danin, kumin chhunga Traffic Dan bawhchhia man 9,508 te hi- Driving License nei lo, kum tling lo lirthei khalh, rui chunga lirthei khalh, lirthei ri bengchheng (sound pollution), Helmet khumlo, Wrong side, Tripple riding, Chak lutuk leh hluahawm taka khalh, Duhdah taka lirthei number ziak, Register loh lirthei khalh, lirthei khalh chunga mei zu leh dan bawhchhiatna dang te an ni a. Lirthei dan bawhchhiat avanga pawisa chawi tlingkhawm zawng zawng hi sawrkar revenue-ah an chhunglut vek thin a ni.

Aizawl Traffic Police te chuan kumin March ni 22 atanga August ni 25 thleng khan Special Drive tum sarih (7) an nei tawh a, Pathianni bikah Aizawl khawpui chhung hmun hrang hrangah Sunday Mobile Checking tum 29 an nei tawh bawk a ni. Kumin 2026 January atanga August thla thleng khan lirthei chetsualna avangin thubuai 69 ziahluh a ni tawh a, lirthei chetsualna avang hian nunna chan mi 68 awmin hliam na tak tuar mi 18 leh hliam tenau tuar mi 22 an awm tawh a ni.