Raltlan te enkawl nan cheng vbc. 2.85 seng tawh

Mizoram a raltlante enkawlna atana Mizo-ram sawrkar-in sum a sen chu Rs. 2,85,39,611/- a tling tawh a. Myanmar raltlante biometric enrolment-a chhinchhiah hna 98.90% zawhfel a ni tawh bawk.
Home Department tarlan danin heng raltlan rawn lut te hi Myanmar, Bangladesh leh Manipur atanga lo lut te niin kumin August 20 thlenga raltlan chhinchhiah zat chu Myanmar mi 29575, Manipur mi 6959 leh Bangladesh mi 1679, an vaiin mi 38213 an tling a. Mizorama Myanmar raltlante biometric enrolment-a chhinchhiah hna hi 98.90% zawhfel tawh niin Bangladesh raltlan biometric enrolment-a chhinchhiah hna chu 100% zawh a ni tawh thung.

Mizorama raltlan lo lut te hi state sawrkar chuan District tina DC te kaltlangin chhawmdawl hna hi a thawk mek zel a, an awmna tur Relief Camp siamsak niin an ei tur buhfai leh mamawh dang pawh pek thin an ni. Hetihlai hian raltlan chungchangah Ministry of Home Affairs atangin tunhnaiah Mizoram sawrkara Home department chuan thuchhuah thar dawn a nei lo thung.