Thuchhuah hriatpui lo tih sawi; Tlabung-ah thukhawm

Congress MLA hlui Nihar Kanti Chakma chuan Inrinni khan Aizawl Press Club-ah thuthar thehdarhtute kawmin, Chakma te awmna hlun anga Tlabung a sawi kaihhnawiha All India Chakma Student Union-ten thuchhuah an siam chu a hriatpui loh thu a sawi a. Artificial Intelligence (AI) hman tangkai tuma thu a ziahna ah Tlabung chu Chakma te khaw hlun (Homeland) leh kum 1898-a British rorelna hnuaia rinluh a nih hmaa Chittagong Hill Tract-a bet leh Chakma te luah chin ram nia a ziah chu a tihsual a nih thu leh thil pawi tak a nih thu sawiin, Tlabung YMA chungah pawh thupha a lo chawi tawh thu a sawi a. Hemi chungchanga boruak a dai tawh nia an hriat laiin All India Chakma Student Union-ten thuchhuah an lo siam leh thu pawh sawiin, hei hi a hriatpuina a nih loh thu leh pawi a tih thu a sawi bawk a ni.

Hetihlai hian Inrinni khan Tlabung-a pawl hrang hrang leh khaw 20 chuanga Village Council te bakah Young Chakma Association (YCA) aiawhte chu thukhawmin Hnam pahnin inkara boruak an thlirho a, he thutkhawm hi YMA Tlabung Branch President TC. Lalnunmawia chuan kaihruaiin, tunhnaiah Mizo leh Chakma-te inkar tichhe thei tur zawngin hmun danga awm, Chakma thenkhat ten Tlabung luah hmasatu angin an inchhal nia sawiin, YMA-in a enliam loh thu a sawi a. Tlabung chu tunhma atang tawha Mizote khaw hlun leh an luah hmasak a ni tih chu Mizo hnam pawm dan a nih reng tur thu leh chu nihphung tihdanglam tuma hmalakna chu a tawp thlenga an dodal zel tur thu a sawi a ni.