Prime Minister Narendra Modi chuan thla tin mipuite hnena thu a sawina, 'Mann Ki Baat' ah nimin khan a vawi 138-na atan thu sawi lehin Mizoram pum-a Anganwadi Centre-a 'Poshan Vatika' (nutrition garden/huan) siam, enkawl leh tihzauh kawnga mipui tangrual hmalakna a fak a. Prime Minister chuan September thla chhunga Rashtriya Poshan Maah (National Nutrition Month) hman mek chungchang sawiin, Mizorama mipui hmalakna fakawm a tih thu hi a tarlang a. PM Modi chuan Mizoram-a mipuite leh pawl hrang hrangte chu tangkhawmin naupangte, rai lai leh nau hnute pe laite tana thlai thar hrisel leh tha siamchhuah a nih theih nan Nutrition Garden te tha takin an enkawl tih a sawi a. “He hmalakna hian Mizo mipuite zia, mahni hmasial lova midangte tana inpekna leh khawtlang tana thawhhona kawktu 'Tlawmngaihna' chu a pholang chiang hle a ni,” a ti.
Prime Minister chuan hetianga mipui tangrual hmalakna tha tak hian chaw tha hmuh loh (malnutrition) laka beihnaah awmze thui tak a neih thu leh chaw tha ei a pawimawhzia pawh a bulthut ber thlengin a thehdarh thei tih sawiin, mipuite hmalakna a ngaihhlut thu a sawi bawk.
