High Court-in eiruk thubuai Appeal tura ngenna a remti

Special Court (Prevention of Corruption Act) in Civil Aviation Wing Principal Consultant hlui J. Lalhmingliana eiru-a puhna thubuaia thiam a chantirna, Mizoram Lokayukta-in Court sang zawka khinlet a dilna chu High Court-in a remtih sak.

J. Lalhmingliana hian April ni 9, 2029 leh ni 10 khan Helicopter hire-na, Consultancy Firm leh Helicopter charter-na sum a vaiin Rs. 1,02,98,020 chu ama mimal Account-ah a dah ni-a sawi a ni a. ‘Hetianga Sawrkar pawisa mimal Account-a dah hi Financial Rules kalh a nih bakah eirukna a ni’ tih sawiin, Congress thalai chuan April ni 26, 2019 khan Mizoram Lokayukta-ah Complaint an thehlut a ni. Hei hi chhuizui ni mah se, thubuai ngaihtuahtu Special Judge (Prevention of Corruption Act) chuan finfiahna leh zirchianna hrang hrangte uluk taka a enfiah hnuah Nov. ni 18, 2025 khan J. Lalhmingliana chu puh a nihnaah hian thiam a chantir a ni.

Court thu tluknaah hian Mizoram Lokayukta chu a lungawi lova, thubuai hi ngaihtuah that a nih theih nan Special Leave pe turin an ngen a. He dilna ngaihtuahtu High Court Judge, Justice Rajesh Mazumdar chuan Lokayukta-in thubuai ngaihtuah that a nih theih nan Special Leave pe tura an ngenna chu a phalsak a. Court thutlukna khinlet an dilna chu ngaihtuah zui a remti a ni.