Nikum leh kumin-ah lirthei chetsualna tum 179 a thleng

Kum 2025 leh kumin July thla inkar chhung khan Mizoram-ah lirthei vawi 179 a chesual tawh a, mi 95-in an thihphah.
Home Department-in an chhinchhiah danin lirthei chetsual chhan tam ber chu khalh chak lutuk vang a ni a, hemi hun chhunga lirthei chetsualna thleng za zela 59.5 chu lirthei khalh chak lutuk vang niin mi 54 an thih-phah a, mi 36-in hliam an tawrh phah bawk. Fimkhur lo taka lirthei khalh avanga chetsualna thleng hi za zela 20.7 a ni a, mi 27-in an thihphah bakah mi 19 in hliam an tuar a, Rui chunga lirthei khalh vanga chetsualna thleng hi za zela 19.8 a ni a, mi 14 in thihphahin mi 14 vekin hliam an tuar bawk a ni.

Lirthei chetsualna titlem tur hian sawrkarin kawng hrang hrangin hma a la a. Mizoram Police kaihhruaina in School, College, Kohhran, NCC, Drivers Union leh tlawmngai pawl hrang hrangte hnenah Road Safety Awareness Campaign an buatsaih thin a. Road Safety Month pual mai bakah hun remchang dangah te pawh Sawrkar mi pawimawh ten Local Cable TV, All India Radio leh Doordarshan-ah te lirthei khalhtute tana hriat tur pawimawh puanchhuahna hun hman thin a ni a, heng bakah hian Social Media kaltlangin Awareness a theih ang a tam kalpui thin a ni bawk.