Serchhip-ah Pre-SIR Final Publication Meeting neih a ni
Serchhip DC Meeting Hall-a thutkhawm hi District Election Officer leh Bawrhsap Paul L. Khuma chuan hovin Serchhip Election Officer Lalchhanhimi chuan SIR 2026 kalpui meka an hmalak dan tlangpui a sawi a, SIR 2026 hi Serchhip District-a Assembly Constituency pathum- 26-Serchhip (ST) AC, 27-Tuikum (ST) AC leh 28-Hrangturzo (ST) AC ah te kalpui niin heng ah te hian a tirah Enumeration Phase kalpui a nih thu leh hemi hnu hian Electoral Roll a hming thun, paih leh siamthat bakah insawn duh te tana hun hawng lehin hemi hnu hian ERO leh AERO te kaihhruaina hnuaiah Hearing neih leh a nih dan te a tarlang a. Ruahmanna hmasa ah hian September 6, 2026-ah Final Electoral Roll chu tarchhuah tur ni mah se Pathianni a nih avanga sawn dil a nih angin Election Commission of India in ruahmanna a siam angin Sept. 7-ah Final Electoral Roll hi tarchhuah a nih dawn thu a sawi a ni.
He thutkhawm ah hian Serchhip AERO Vanthangpuia chuan Electoral Roll Hearing an neih dan tlangpui tarlangin, dilna lut hrang hrang leh an chinfel dan tlangpui te a tarlang bawk a. Zawhna leh chhanna hun hmangin he huna tel Political Party hrang hrang aiawhte bakah YMA, MUP, MHIP leh MJA aiawh ten SIR 2026 a an hriatchian duh hrang hrang leh an hmuh dan te an sawi bawk a ni.
Serchhip District Election Officer Paul L. Khuma SIR 2026 hlawhtling taka neih a nih theih nana thawktu zawng zawng te, khawtlang hruaitute, Media te leh Political party aiawhte thawhpuina zawng zawngah lawmthu a sawi a ni. Nimin vek khan ERO te chu an Bial theuh ah hetianga thutkhawm hi nei tura tih an ni bawk.