NE Regional Muaythai Championship 2026 zofel
Mizoram Muaythai Association bultuma tunkar Nilaini atanga R. Dengthuama Hall, Mualpui-a neih North East Regional Muaythai Championship 2026 kharna hunaah hiaan Chief Minister Lalduhoma chuan Muaythai chu kut inthlaka infiamna (contact sports) hlauhawm ber pawl leh tunlai khawvela lar ber pawl a ni tih sawiin. “Olympic Sports Discipline la ni chiah lo mah se eizawnna tlak infiamna a ni tawh a, Mizo tlangval Nazareth Lalthazuala pawhin ONE Championship-ah contract tha tawk tak a nei tawh a ni,” a ti a. Hetiang lama infiamna hi Mizote khelh chi tak a nih thu sawiin, “Muaythai-ah kher lo pawh contact sports dangah India ram aiawhin kan thalaite an feh chhuak reng a, lawmman ropui tak tak an rawn hawn thin a. Theihna kan neihna lama nasa taka kal hi a finthlak a ni,” a ti a. He huna infiammi kalkhawmte chu nasa zawka inbuatsaih tura chahin, “Sum leh pai lakluhna hnarah leh kan ram leh hnam chawimawi nan lo hmang ang che u,” tiin Infiamna chu kan inkara inpawhna tha min thlentu a nih thu a sawi bawk a ni.
North East Regional Muaythai Championship 2026-a hian India hmarchhak State te an rawn kal kim a, player 350 ten intihsiakna huang 100-ah inelna an nei a, a pumpui-ah Mizoram chu pakhatna niin Meghalaya leh Tripura Team ten an dawt a ni. He intihsiakna kharna hunah hian Adviser to Chief Minister Lalmuanpuia Punte leh Gavin Miguel Mylliem MLA, Meghalaya bakah Ram Choudhary, General Secretary, United Muaythai Association of India te chu khual zahawm niin thu an sawi bawk.