National Action Plan for Drug Demand Reduction (NAPDDR) atana hma la tha berah Mizoram puang
.jfif)
India rama Ruihhlo hmansual hluar zel tur venna atan Central sawrkar chuan ramchhunga State zawng zawngin an kalpui tur, National Action Plan for Drug Demand Reduction (NAPDDR) hi a duang a. NAPDDR atan hian Mizoram-ah chuan Social Welfare, Women & Child Development Department, Govt. of Mizoram chu Nodal Department niin NAPDDR in a tum tlangpui te chu ruihhlo ti mek ten damna kawng an zawhna tura hmalak te, Enkawlna tha an dawn theihna tura Treatment Centre-a dahluh te, Ruihhlo ngai enkawlnaa thawkte tha tichak tura kawng hrang hranga zirtir te a ni a. Ruihhlo la ti ve lo naupang leh thalaite hnena uluk taka zirtirna pek (Awareness) chu ngaih pawimawh a ni bawk a. Kohhran leh tlawmngai pawl hrang hrangte nena thawkho in sawrkar chuan hma lain Hmeichhia leh naupangte ruihhlo laka an lo him zel theihna turin an zingah theihtawpa hmalak a ni bawk.
Hetianga hmalakna tur hrang hrang hi State Level-ah a changtu Social Welfare Minister Lalrinpuii hova uluk taka ngaihtuah leh remruat thin a nih bakah District Level-ah DC ti nten an thawk tha hle bawk a, Block Level thlengin hmalakna hi kalin Ministry-ah rang taka hmalakna report thehluh nghal thin a ni a. Hetianga hmalakna ah hian State bakah District te an tang hle a, hetianga lungrual taka thawhhona leh thawh rim rah hi India Sawrkar laipuia Ministry thuneitute pawhin an hmuh hmaih lo tih sawrkar thuchhuah chuan tarlangin, September ni 3, 2026-a Secretary, Ministry of Social Justice & Empowerment, Govt. of India kaihhruaia thukhawm chuan India ram puma ruihhlo dona -National Action Plan for Drug Demand Reduction (NAPDDR) atana State zawng zawng zinga hma la tha ber (pakhatna) atan Mizoram chu an puang a ni.
NAPDDR hnuaiah hian District zawng zawnga ruihhlo dona atana hmalakna tura Central sawrkarin a ruahman Nasha Mukt Bharat Abhiyaan (NMBA) chu District tinah kalpui mek a ni a. District tina Deputy Commissioner te chu NMBA-ah hian Chairman niin District hnathawh lo enpui turin Chief Secretary kaihhruaina hnuaiah ‘State Level Steering & Monitoring Committee on Drug Demand Reduction’ chu a awm bawk a. District tinin ruihhlo dona tana chak zawka hma an lak theihna turin District tina Deputy Commissioner te kaihhruaina hnuaiah ‘District Level Committee on Drug Demand Reduction’ din niin, ‘Block Level Committee on Drug Demand Reduction’ chu BDO kaihhruaina hnuaiah din a ni a ni bawk a; nasa zawk leh chak lehzuala hmalak tum mek a ni bawk.