MSPMC ten Serchhip District-a NH-02 dinhmun an enfiah

Mizoram State Project Monitoring Committee (MSPMC) Team te chuan nimin khan Serchhip District chhunga National Highway-02 kawngpui dinhmun leh thawmthat hna thawh mek chu a hmunah kalin an rawn enfiah.
MSPMC Inspection Team-te hian Serchhip District chhunga kawngpui (NH-02), Khumtung atanga Bungtlang thlenga siam lai mek tha tawk lo leh tlo lo lutuk chu a hmunah rawn zirchiangin, kawng chhiat zualna laite chu Satellite hmanga location chhinchhiahna, Differential Global Positioning System (DGPS) hmanga an chhinchhiah bakah Drone hmangin an endik a, hemi rual hian kawng chhuat siamna - Bituminus Conctrete (BC) sample te, kawng siamtu Contractor ten Pot Hole (kawng khuar) an siam/hnawhna hmanrua (materials) te bakah Mixed Plant material-te chu uluk zawka endik turin a sample an la nghal bawk a. Bungtlang-a hnathawktute hmunhma (Hot mixed plant) pawh an tlawh nghal bawk a ni.

Heng bakah hian Serchhip leh Chhhiahtlang By-Pass Road dinhmunte pawh MSPMC hian a hmunah tlawhin an zirchiang nghal a, Serchhip-a sawrkar hnathawk te Quarters tura sak, General Pool of Accomodation building te pawh an tlawh nghal bawk. MSPMC Team te hi Serchhip DC Office atangin Addl. DC Dorothy Muansangi bakah PWD Serchhip Division-a SDO Lalrinhlua Ralte ten an lo tawiawm a ni.