MNF in hruaitu ruat belh; Nakum-ah inthlang dawn lo

MNF President Zoramthanga chuan an Party Constitution Bung 3, chang 21B (xv) in thuneihna a pek angin MNF Party chak zawk leh tluang zawka a kal zel theih nan an party hruaitu a ruat belh a, hemi ang hian Working President atan Tawnluia (Chawnpui Veng) leh Vice President atan Lalchamliana (Electric Veng) leh D. Thang-liana (Khatla)-te chu a ruat thar a. MNF Party-ah hian Dr. R. Lalthangliana chu Sr. Vice President ni sa in, Vice President-ah Vanlalzawma leh Lalchhandama Ralte te bakah Treasurer-ah Lalruatkima te an lo awm sa tawh bawk a ni.

Heng hruaitu ruat thar te hi nimin khan MNF President, Zoramthanga chuan Aizawl-a Mizo Hnam Run-ah puangin, an party inthlan hun chu nakum ni mah se an inthlang dawn lo tih a sawi a, MNF President chuan ZPM chuan an party General Headquarters inthlan an huphurh thu leh inthlanna neih tum lovin Vice President pawh engemaw zat an ruat belh tawh thu sawiin,” Congress pawh an inthlang dawn lo, Vice President pawh an inruat belh zel,” a ti a. “Keini pawh hi nakum kan party inthlan hun a ni a, inthlang ta i la, Elected OB thar, NCC, PAC, Adviser, GS, Secretary leh Frontal zawng zawng a vaia inruat thar a ngai dawn a. Promotion beisei nei mi tam tak kan tikhaihlak thei bawk a. Term dangah pawh kan lo tih thin fo tawh angin party inthlan chu MLA Election dawn a ruaiah kan nei ngai lo a, MLA inthlan zawh hunah kan nei zawk dawn a ni,” tiin “Party dang pawhin an ti vek a, keini pawh kan Constitution-in President thuneihna a pek angin hetiang hian kan party chak lehzuala a kal theih nan kan inruat thar a ni,” a ti.

MNF President chuan kum 1986 June ni 30-a inremna kan neih chhuanawm zia pawh sawiin, “Mizoram mipui tan chhinchhiahtlak leh pawimawh ber a ni a, India ram hruaitute leh khawvel ram dang hruaitute pawhin ropui an tiin min ngaih hlutsak hle a ni,” a ti bawk.