Mizotaxi App-a inziahluh hun September ni 30 thleng pawtsei
.jfif)
State Transport Authority (STA) chuan thuchhuah siamin Mizoram chhunga Passenger phur chi lirthei chi hrang hrang, Four Wheeler Taxi, Two Wheeler Taxi leh Auto Rickshaw-a chuang thin te'n sawrkar approved rate diktak an chawi theihna atana duan ‘Mizotaxi app’ chu Aizawl khawpui chhungah hman chhoh mek zel a ni tih an tarlang a. Hetihlai hian ‘Mizotaxi app’ hnuaia lirthei inziaklut ten mipui mamawh khawp an la phuhruk zawh loh avang leh lirthei inziaklut an la tlem avangin Trip Cancel a tam thu an tarlang a. STA chuan Mizotaxi App hnuaia inziahluh theih hun chu July ni 31 khan titawp lawilawk mahse huntiam chhunga inziaklut ve hmanlo leh online kaltlanga dil, huntiam chhunga in clear hman lo te an awm avangin Mizotaxi App hnuaia inziahluh hun chhung chu tun thla ni 30 thleng pawhsei a nih thu an tarlang a ni.
Tun dinhmun ah ‘Mizotaxi app’ hnuaiah lirthei 1549 inziaklut an awm tawh a, heng te hi Two Wheeler Taxi 1134; Four Wheeler Taxi 391 leh Auto Rickshaw 24 niin Mizotaxi app-a in register tum zingah hnawl 152 an awm a. Lirthei inziaklut te hian ‘Mizotaxi sticker’ belin Aizawl khawpui chhungah documents clear vekin, a khalhtu fel taka register in an service mek tih an sawi a. Mizotaxi app hnuaia inziaklut lirthei te chu mipui mamawhna phuhru tura online reng tur leh a tam thei ang ber tlan turin an ngen a ni.
Hetihlai hian Aizawl Two Wheeler Taxi President Lalhmunmawia chuan thuneitu lamin inziahluh hun pawtsei mah se sawrkar laka an thilphut hrang hrang tih hlawhtlin sak an nih hma chuan inziahluh an tum rih lo tih a sawi thung a ni.