Mizorama a vawikhatna atana ‘Pluck and Pay Festival’ hman a ni
Tourism Department leh Khawzawl DC Office tangkawp buatsaih ‘Pluck and Pay Festival’ hawnna hun hi Tualte-a Vanhnuailiana Hall-ah neih niin Khuallian nia he hun hmanpuitu Tourism Minister Lalnghinglova Hmar chuan kan ram mawina te, kan boruak thianghlim te, kan thing leh mau te hi khualzin hiptu a nih thu sawiin, heng kan ram mawina leh hausakna phochhuak tura Pluck and Pay Festival buatsaih a ni hi lawmawm a tih thu a sawi a. Hman khat daih plastic tel lova he festival hman tum a ni chu fakawm a tih thu sawiin, Festival dang la awm turah pawh plastic tel lova Green Festival hmang turin hma lak tum a nih thu a sawi a. He Festival buatsaih kawnga Department hrang hrangte karah thawhhona tha tak a awm chu lawmawm a tih thu a sawi bawk.
Tourism Minister chuan Festival-ah hian Mizoram pawna mi khualzin lo kal se an tih rualin, “Mizoram chhunga chengte hian kan rama hmun mawi leh pawimawh te kan ngaihsana kan ngaihhlut hmasak a ngai,” a ti a. Kan ram chhunga chengte hi kan intlawhpawha, kan ram mawina thehdarhtu Ambassador kan ni theuh thei tih sawiin, Chawngtlai leh Tualte mipuite inpekna leh thawhrimna avangin lawmthu a sawi bawk.
Pluck and Pay Festival hi September 23 atanga 25, 2026 chhung hian Chawngtlai leh Tualte khuaah neih tur a ni a. Festival chhimtu mipuiten a thlengtu khuaa loneitute huanah kalin thei leh thlairah chi hrang hrang lo in, an lei thei dawn a. Chawngtlai Kawn-ah kuthnathawktute tharchhuah leh siamchhuah zawrhna dawr engemawzat a awm a, Zawlkhaw Adventure Club-ten zipline hmanga uai theihna an buatsaih bawk a. Chawngtlai Historical Society leh Tualte Vanglai Committee-te kaihhruaiin historical leh tourist site hrang hrang, Pathian tlang te, Nikuala Lungdawh te, Zo Hill Station te, Pasalthate In hmun te leh hmun pawimawh dangte a tlawh theih a. Heng bakah hian mipuite intihhlimna tur Mizo infiamna hrang hrang bakah tlai lamah Concert buatsaih a ni bawk.
He Festival hawnna hun hi Tualte Village Council President, Lalchhanchhuaha chuan kaihruaiin Khawzawl Bawrhsap, K. Vanlalthiana chuan inlawmna thu a sawi a, Khawzawl Addl. DC leh Organising Committee Co-Chairman K. Zorammuana chuan Reprt pein mipuite tlawh theih turin Chawngtlai-ah Kiwi huan 3, Sapthei huan 5 leh Tomato huan 5 thlanchhuah niin, Tualte-ah Sapthei huan 2, Fanghma huan 5, Tomato huan 5 leh Bean huan 2 thlanchhuah a nih thu a sawi a. Horticulture Department-a Addl. Director C. Zosangliana chuan Tualte leh Chawngtlai khuaa thei leh thlai chin kawnga Department hmalakna sawiin, Tualte khuaah hian kum 2019 atang khan Horticulture Department-in Tomato ching turin hma an lak thu leh chhungkaw 200 chuangin eizawnna atan hmangin, tun thlengin quintal nuai 10 chuang an thar tawh bakah cheng nuai 1400 chuang an lakluh tawh thu a sawi a. Tualte khuaah vek hian kum 2025-2026 chhungin MIDH Scheme hnuaiah chhungkua 151-te chu Sapthei ching tura thlan an nih thu a sawi bawk.
Chawngtlai khuaah hian kum 1995 vel atang tawh khan chhungkaw 10-in Sapthei an lo ching tawh a, Sapthei chinna atana an mamawh tur bungrua (material component) hrang hrang pek an ni a. Kum 2020 vel atang khan mumal taka Tomato chin niin, tunah chuan chhungkaw 120 chuangin eizawnnan an hmang mek a. Tomato quintal 8000 chuang hralh tawhin cheng nuai 400 chuang zet an lalut tawh bawk a ni. Tun dinhmunah Mizorama tomato thar chhuak hnem pawl an ni.