Mizoram-a hnamdang enkawl Petrol Pump te Sept. ni 17 atanga khar turin MZP in an hriattir
Nimin-a thuchhuah an siamah MZP General Hqrs. chuan Mizoram chhungah hnamdang Mizo hming hawh leh hnamdang (vai) sumdawng an rawn pung chho zel chu an vei takzet tih sawiin, “Hei hi hnam anga min chimralna kawng hawngtu zau tak anih avangin MZP chuan a ngaimawh hle a, a tawp thlengin hma a la zel dawn a ni,” an ti a. Mizoram chhunga hnamdang Petrol pump enkawl leh hnamdangte thawhna Petrol pump chu September ni 17, 2026 (Ningani) atanga khar tura hriattirin, “Hemi bawhzuina atan hian, MZP Headquarters, Sub-Headquarters, Branch leh Hnampual zirlai pawl a kan thawhpui zawng zawngte'n mahni huamchhunga Petrol pump inkhar zawng zawngte lo chhinchhiah tur leh a tul anga Petrol pump neitute hming leh an sumdawnpui hnamdang (vai) te lo chhinchhiah vek turin kan in hriattir a ni,” an ti a, heng hnamdang (vai) sumdawnpui-a mipui dawr theih loh a inkhar zawng zawngte a tul anga an hming puanzar a nih tur thu an tarlang bawk.
Kar kalta Ningani khan MZP hian thuchhuah siamin Mizoram-a Petrol Pump tam tak chu a hmun leh license Mizo ni si, hnamdang (vai) in an enkawl, a neitu nihna nei tam tak an awm tih sawiin, “Mizote hian hnamdang(vai) nen a inremsiam in sum tam tak hlawhin an ram leh license hi an hmantir nasa hle a ni,” an lo ti tawh a. Heng hnamdang Mizo hming hawha Petrol Pump nei te hi an hriat vek thu leh Political party a inhmang tak takte pawh an awm thu an lo tarlang tawh a ni.
Hemi hmalam hian All Mizoram Petroleum Dealers Association (AMPEDA) chuan an Member zinga Manager (hnamdang)-te chu MZP Office-ah hren an nih thu leh tihluihna in September ni 7, 2026 khan cheng nuai hnih transfer tir an nih piah lamah Pump hrang hrang atangin cheng nuai 1.2 dang transfer tura phut mek an nih thu an lo tarlang tawh a. September 16, 2026 ralhmaa MZP-in pawisa an laksak te an pek let loh leh transfer tura an tihte an hnukdawk lo a nih chuan September 17, 2026 atangin Mizoram chhunga petrol pump zawng zawng tiamchin awm lovin khar an tum thu an lo puang tawh bawk a ni.